O dianteiro ourensán abandona o club coruñés dous anos despois da súa chegada e tras marcar varios goles de gran relevancia
02 ago 2025 . Actualizado á 19:07 h.É oficial. Davo deixa de ser xogador do Deportivo, certificando o fin dunha relación que xa tiña data de caducidade. Dúas tempadas atrás, cando o dianteiro vestiu por primeira vez a camiseta branquiazul, non podía imaxinar os altibaixos que viviría durante a súa estancia na Coruña.
O atacante, nacido en Ourense, chegou ao club herculino tras dar por acabadas as súas etapas en Polonia e Bélxica e co obxectivo de axudar a regresar a Segunda División a unha entidade que lle marcou cando estivo no estadio. «Fun por primeira vez a Riazor no partido en que o Barcelona gañou a liga e o Dépor descendeu a Segundo. E eu namoreime», recoñeceu en abril do 2024 nunha entrevista para La Voz.
A pesar de comezar con dúbidas a súa primeira campaña como deportivista, o seu gol nos últimos instantes ante o filial do Barça, e o antolóxico dobrete de cabeza ao Arenteiro, erixírono como un dos artífices da incrible remontada que protagonizou o equipo coruñés. Eses encontros supuxeron un punto de inflexión no renacer dun persoal que se fixo forte para acabar logrando o ascenso á categoría de prata.
De heroe ao ostracismo
No seu segundo curso no club, o ourensán desapareceu dos plans do corpo técnico (tanto de Idiakez como de Gilsanz), saltando ao campo en só dez ocasións e disputando menos de cen minutos en liga.
En xaneiro foise cedido a Primeira RFEF para xogar no Murcia. Ao seu regreso a Abegondo unha vez rematada a tempada, a súa saída dábase por segura. O dianteiro buscará agora recuperar o seu mellor nivel en Portugal, aproveitando as sinerxías entre o Deportivo e o Penafiel.
Vaise un dos homes do retorno a Segundo, o que evitou a destitución de Imanol en varias ocasións. Marcha aquel que, quizá, foi capaz de cambiar o futuro do club. O tempo será o xuíz que ditará a importancia real do gol de Davo no Estadio Johan Cruyff.