O central catalán formado na canteira do FC Barcelona, que militou a última tempada na SD Eibar, interesa ao club branquiazul
26 jun 2025 . Actualizado á 19:39 h.A dirección deportiva do Dépor continúa traballando para formar o persoal herculino para a próxima tempada en Segunda División. O nome que tomou forza nas últimas horas é Arnau Comas (Cassà da Selva, Xirona, 2000), central de 1,91 metros.
Foi formado nas categorías inferiores do FC Barcelona, chegando a ir convocado en dúas ocasións co primeiro equipo, e gañando a Youth League co xuvenil no 2018. Actualmente é futbolista do Basilea, co que xogou 43 partidos nas últimas tres tempadas, e ten contrato en vigor ata o 2026.
No mercado de inverno da pasada campaña volveu ao fútbol español para militar cedido na SD Eibar, onde participou en 9 partidos sumando 682 minutos ata unha lesión no seu ombro que lle fixo pór punto e final á súa campaña no conxunto armeiro.
Internacional coa selección sub-21 nun partido ante Xapón, xa espertou o interese de máis equipos de Segunda División para facerse cos seus servizos de cara ao próximo ano.
Tras a marcha de Pablo Martínez, Jaime Sánchez e a dubidosa situación de Pablo Vázquez, o Deportivo busca apontoar a súa zaga cun central contundente e de experiencia en Segunda División.
O mercado móvese
A de Arnau Comas non sería a primeira chegada neste mercado para a tempada 25/26 tras a volta a casa de Jairo Noriega. O centrocampista coruñés militou a pasada tempada no Ourense CF de Primeira Federación, onde con 29 partidos xogados foi peza crave para a salvación do conxunto ourensán.
Asinou por tres tempadas máis unha opcional, aínda que todo fai indicar que a próxima campaña xogará cedido no Racing de Ferrol, en Primeira Federación, onde coincidirá con Pablo López, o seu adestrador no pasado curso.