A Irmandade Galega de Caracas celebrará o domingo unha festa na que se retransmitirá o partido contra o Racing de Santander
22 abr 2025 . Actualizado á 21:21 h.O plan de expansión internacional do Deportivo afronta un ambicioso paso. Só un mes despois de que o club protagonizase a segunda parte da súa xira promocional polo Brasil, pon en marcha unha nova en Venezuela, outro dos países onde a emigración galega goza de maior presenza e o fútbol tamén conta cunha importante implantación no deporte masculino e feminino. Baixo o título DEA x Venezuela, varias reunións e diferentes eventos levarán a aquelas terras o amor pola branquiazul.
A actual expedición deportivista está encabezada pola vicepresidenta Michelle Clemente e o responsable da área internacional Alejandro Vidal. A súa axenda comezou nas últimas horas cunha visita ao Caracas FC, un dos grandes equipos venezolanos. Os representantes do club coruñés tamén foron recibidos na Irmandade Galega de Caracas e mantiveron un encontro na Federación Venezolana de Fútbol.
Un dos eventos principais desta visita celebrarase o vindeiro domingo día 27. A Irmandade Galega de Caracas acollerá unha festa na que un dos actos centrais será a retransmisión do partido que o Deportivo disputará o vindeiro domingo nO Sardinero contra o Racing de Santander. En colaboración coa liga tamén se sortearán diferentes artigos de promoción da entidade branquiazul e disputarase un choque amigable.
A vinculación entre Venezuela e o club coruñés vén de longo, pois a futbolista Michi Apóstolo forma parte do Dépor Abanca hoxe en día, do mesmo xeito que anteriormente o fixeran outros xogadores como Oriana Altuve, Gaby, Michelle Romero, Kika e Christian Santos.
Ademais, o primeiro equipo masculino levara a cabo unha xira de partidos polo país suramericano durante a pretemporada do 2008. Foron tres amigables (contra o Minerven en Porto Ordaz, o Marítimo de Funchal en Caracas e o Deportivo Táchira en San Cristóbal) cos que preparara unha campaña na que o cadro branquiazul, entón adestrado por Miguel Ángel Lotina e con, entre outros, Manuel Pablo, Valerón, Filipe Luis e Aranzubia no persoal, militou en Primeira División e disputou por última vez competicións europeas, neste caso a xa extinta Copa da UEFA.
O precedente do éxito do evento no Río de Janeiro
A boa acollida da xira polo Brasil serve como referencia ao Deportivo. O club branquiazul xa viaxou dúas veces ao país da Canarinha: en outubro pasado, integrantes dos seus órganos directivos visitaron a Mauro Silva, vicepresidente da Federación Paulista, e mantiveron reunións con responsables de equipos daquel país. Ademais, a finais do mes pasado, regresou con todo un programa de actividades e (na foto) un grande evento na Casa de España en Río con motivo do Racing-Dépor.