A tele adelgaza ao Dépor

Desde que os móbiles puxeron as cámaras a tiro de calquera e levaron o cine doméstico máis aló da voda, a viaxe a Canarias e a comuñón, proliferan en redes sociais experimentos destinados a probar que o obxectivo engorda, como xa viñan sostendo hai tempo as estrelas máis coquetas do televisor. O Deportivo, sempre empeñado na peculiaridade, iniciou con todo unha campaña ao contraxeito, aproveitando o seu regreso ao fútbol profesional. Partido a partido (a fórmula vale para todo) a tele adelgaza a conta de puntos branquiazul. Cada paseo (efectuado ou aforrado) ata o monitor complica a vida e sementa desconcerto no conxunto coruñés.

«O que teño é a percepción de que xa non temos claros os criterios», protestou en Anduva Óscar Gilsanz. «Todo o mundo está despistado e gustaríanos que se aclarasen», reclamou máis tarde Diego Vilares. Incluso Fernando Soriano aventurouse en zona mixta para compartir que «hai algún criterio do VAR que non acabamos de entender».

En principio, a confusión afectaría especialmente á cuestión das mans, convertido en asunto maior cada vez que se aplica (ou non) o regulamento ao Barça ou ao Real Madrid. De aí cara abaixo, a polémica perde fol, e dificilmente desatarase un movemento ao redor do sucedido nun partido de Segunda División. Neste de Miranda de Ebro, Pablo Martínez tocou primeiro coa perna e botou despois a luva á bóla en posición pouco natural. Chamada de Ais Reig, once metros e gol.

Non foi o primeiro contacto entre o árbitro daquela noite tola nO Arcanxo (a da expulsión de Natxo González, Borja Valle e Pablo Marí) e o seu colega Muresan Muresan. No tramo inicial do choque corrixíralle cando decidiu non sinalar outra posible infracción do central francés. Nesta oportunidade, un leve contacto con Panichelli, insuficiente para cobrar penalti na valoración inicial.

O Deportivo sobrevive a todo en Miranda (2-2)

Pedro Barreiros

A segunda peritaxe fíxose agardar. «Cambiou un pouco o partido, con ese tempo aí parados», queixouse o técnico do equipo que a esas alturas gobernaba o duelo e mandaba no marcador. A corrección alterou a dinámica e ao veterano traseiro, xa fóra de si cando viu o colexiado  enfilar a pantalla por segunda vez.

Exasperado por un chivatazo que non se produciu tras o gol anulado na Malata nin se tivo en conta para invalidar o de Soro en Castalia. Así, ata nove puntos escamoteados polo videoarbitraje. «Agardo que a súa intención non sexa faltarnos ao respecto, pero hai decisións comprometidas e sabemos o que significa o Dépor para o fútbol español», denunciou Vilares. Non hai peso que perder.

---

---

---