Yeremay non xogará máis esta campaña tras operarse para resolver problemas respiratorios
TORRE DE MARATHÓN
O Deportivo agarda que o mozo extremo canario poida arrincar a pretemporada «en plenitude de condicións»
23 may 2024 . Actualizado ás 15:45 h.Yeremay perderase os tres partidos que restan ata que conclúa o curso. Non xogará co Dépor o encontro deste sábado (19 horas) fronte ao Real Unión nin poderá participar no dobre enfrontamento co Castelló (mércores da próxima semana en Riazor e domingo en Castalia) para dirimir o equipo que se proclamará campión de Primeira RFEF.
O motivo é médico: o extremo sofre desde hai meses problemas respiratorios que agarda solucionar cunha operación, unha vez que o equipo conseguiu o obxectivo de retornar a Segunda. Segundo anunciou o club, «o futbolista canario estará unhas semanas en repouso deportivo para arrincar a pretemporada en plenitude de condicións».
Imanol Idiakez queda deste xeito sen unha das pezas crave no seu once. O mozo extremo, recentemente renovado ata o 2030, participou en 25 duelos; 23 deles, como titular. Anotou catro goles. A baixa no costado esquerdo do ataque permitirá incluír a algún dos futbolistas que menos participaron ata agora, como Pablo Valcarce ou Berto Cayarga, ou trasladar a esa banda a David Mella, quen acostumaba ocupala antes de que o míster decidise emprazalo na dereita.