Só a sensacional actuación do porteiro do Mataró e o ferro da portería impediron outra goleada verdibranca
18 oct 2020 . Actualizado ás 13:50 h.Menos dunha semana despois de levar merecidamente os tres puntos do Palau, ao Liceo tocáballe volver pórse o mono de traballo. Partido domingo á mañanciña. E obrigación de lograr unha vitoria que, en caso de producirse, non ía encher de felicitacións as aplicacións de Whatsapp dos xogadores. Pero os tres puntos valían igual. E os coruñeses non fallaron. Impuxéronse ao Mataró por 2-0 nun encontro no que volveron ser unha apisoadora ofensiva. Sen o acerto de cara ao gol da partida fronte ao Palafrugell, pero o conxunto galego apenas deu tregua ao seu rival durante os 50 minutos. O premio, a cuarta vitoria consecutiva da tempada, que lle permite situarse como provisional líder en solitario, á espera do que faga o Reus pola tarde en Caldes.
O Mataró foi un dos tantos equipos que chegou ao Palacio co único obxectivo de encaixar os menos goles posibles. Consciente de que visitar Riazor pode asemellarse á experiencia de ir ao dentista, -expresión acuñada hai uns anos por Joaquín Caparrós para referirse aos encontros de fútbol no Camp Nou para os rivais-, o equipo de Daniel Villar plantouse na pista co desexo de que todo pasase rápido e sufrir o menos posible. Así foi, o equipo apenas sufriu, coa excepción do seu porteiro, Sergi Grané, cuxo corpo se converteu no pin pan pun dos locais. Coas manoplas, coas proteccións das pernas, co casco, coa o peito… Non houbo parte algunha que non recibise o impacto dunha das decenas de bolazos enviados polo corpo de artillería verdibranco. E algunha das que se lle escaparon estivo o ferro da portería para repelelas. Non foi unha excepción. Foi un partido máis dos moitos que viviu o Palacio o ano pasado e dos que quedan por vivir no presente exercicio.
A intensidade e velocidade que imprime o equipo de Juan Copa en cada encontro provoca que os rivais bastante teñan con aguantar o ritmo en defensa como para prodigarse en ataque. Con todo, cando a porcentaxe de efectividade coruñés baixa, o perigo dun desgusto aumenta.
Nesta ocasión, o Deportivo Liceo tardou nove minutos en abrir a lata do Mataró. Foi grazas a unha acción individual de Adroher, un deses xogadores que cando están na pista, aínda que pasen inadvertidos durante minutos, sábese que en calquera momento pode pasar algo. E sucedeu que se impulsou, arrincou, mirou a meta contraria, meteuse polo medio dunha maraña de xogadores, xutou e marcou. Primeiro tanto, que facía presaxiar maior comodidade da que houbo.
O gol non variou a disposición dos adversarios. O Liceo mantivo a súa formulación ofensiva, coa habitual roda de cambios inesgotable de Copa, e o Mataró atrás, ben pechado. Tan ben plantado estivo o cadro visitante que o segundo tanto non chegaría ata a segunda parte. Como sucedese no Palau, foi como consecuencia de un tiro duro e seco de César Carballeira. Sucedeu aos 2.30 de iniciarse o segundo tempo.
Quedaba toda a segunda parte e o Liceo parecía ter atopado o que quería: unha distancia cómoda no marcador. Pero o Mataró non variou o seu posicionamento. Por momentos pareceu abrirse un pouco máis, pero mantendo toda as precaucións atrás. E así se foron consumindo os minutos, entre faltas directas erradas polos galegos, paradas de Sergi Grané e bolazos ao ferro. Mesmo guion ao da primeira parte e idéntico resultado. A tranquilidade absoluta non chegaba, pero tampouco había sensación algunha de que o resultado perigase. Como así foi. O electrónico púxose en 0 e os tres puntos subiron á marcadora dos galegos. Cuarto partido, cuarta vitoria e a seguir soñando.
Ficha técnica
Deportivo Liceo (2): Carles Grau, César Carballeira, Dava Torres, Platero e Adroher -cinco inicial- Maxi Oruste, Marc Grau, Roberto Dei Benedetto.
Mataró (0): Sergi Grané, Gerard Crusachs, Oriol Lladó, Alex Cantero e Marc Ollé. -cinco inicial-, Florenza, Xicota e Erik Gual
Goles: 1-0, min 9: Adroher; 2-0, min 22.30: Carballeira;
Incidencias: Encontro correspondente á cuarta xornada da OK Liga , disputado no Palacio dos Deportes de Riazor. O Liceo cubriu a cota de 300 espectadores que lle permitiu a Xunta de Galicia para este partido.