É a segunda vez que o Racing cambia de adestrador no que vai de tempada despois de que Cristóbal Parallo substituíse a Iván Ania en novembro
04 feb 2020 . Actualizado á 18:18 h.Substitución de banco no Racing de Santander. O club cántabro anunciaba este martes pola mañá a saída do técnico exdeportivista Cristóbal Parralo e esta tarde fixo oficial a fichaxe do tamén exdeportivista José Luis Oltra, que será o encargado de intentar lograr a salvación en Segunda División.
É a segunda vez que o Racing cambia de adestrador no que vai de tempada. Cristóbal Parralo chegaba en novembro ao club para substituír a Iván Ania, co que o equipo gañou só un partido desde o inicio da súa volta a Segundo. O xa extécnico racinguista non cultivou mellores resultados nos apenas tres meses que estivo a cargo do equipo. En once xornadas o cordobés tan só sumou unha vitoria e seis empates ademais de catro derrotas. Por iso este martes chegou a un acordo co club para rescindir o seu contrato.
Nun breve comunicado, o Racing de Santander informaba que e a saída de Parralo fora «adoptada de común acordo, tras analizar a situación do equipo verdibranco».
O Racing de Santander é o actual faroliño vermello da Segunda División española e cada semana distánciase un pouco máis do resto de equipos e da salvación. A día de hoxe ten 21 puntos e o Albacete, equipo que marca a salvación conta con 28, mesmos puntos que Málaga e Oviedo.
Os verdibrancos encomendan a José Luis Oltra a difícil tarefa de permanecer en Segundo. O valenciano, que levaba sen traballo desde o pasado mes de maio, cando foi destituído no Tenerife, estrearase no banco cántabro este venres, na visita do Racing ao Almería.