Nas tres últimas xornadas acumula ata 56 disparos, 19 deles a porta, pero un só gol, de penalti, e con Martí, é o cuarto equipo que menos marca
08 jun 2019 . Actualizado á 05:00 h.Cada noite, cara ás nove (que poden ser as dez ou as once), unha mensaxe anuncia aos encargados de cubrir a información do Dépor quen será o próximo futbolista en acudir a dar explicacións a sala de prensa de Abegondo. Se non hai sorte, será posible anticipar cada contestación das elixido horas antes de acender o micro; sen necesidade de agardar ao día seguinte. Nos mellores casos, con todo, a mañá arrinca con respostas frescas. Sinal de que é o nome de Dani Giménez o que saltara no móbil. Ou o de Borja Valle.
A espontaneidade do berciano deixa matices distintos incluso fronte ás cuestións máis recorrentes. Fáltalle puntería ao Deportivo. En Riazor, en Lugo ou en Elxe. «Foder, non se pode ter máis ocasións e que te saquen máis goles», exclamaba o 19 con brillo nos ollos e un sorriso que delataba as bondades dun empate a cero onde parecía obrigada a vitoria. «Creo que non se pode facer moito máis para conseguir un gol -insistía-. Imos con boas sensacións. É certo que se marcas, aínda máis». E é ese «pareceríanos mellor» o que estirou a agonía branquiazul ata volver ao momento de partida. Quinto empatado a puntos co sexto cando se foi Natxo. Sexto, un punto por amais do Cádiz, desde que chegou Martí. En promoción entón e agora. Cada vez con menos gol.
Durante os oito encontros dirixidos polo novo técnico, o conxunto coruñés marcou sete veces, a metade (no mesmo prazo) que o seu rival de onte e oito menos que o Málaga, o seu posible adversario en promoción (a quen penaliza neste rexistro o 1-0 regalado polo Reus). Só tres equipos (Sporting, Numancia e Alcorcón) viron menos porta que Dépor. Ningún conta cun argumento mellor para considerar inexplicable a súa situación. Ningún ten a Carlos.
O dianteiro andaluz é o futbolista que máis xuta da categoría. Tanto se o balance se realiza partido a partido (2,96 de media) coma se se contan os disparos por cada 90 minutos sobre o céspede (3,35). Tamén é o mozo do 18 quen máis tira entre os tres paus (1,22 veces por duelo), aínda que para colocalo no alto deste apartado hai que eliminar a Enric Gallego, que marchou en xaneiro ao Huesca cunha media de 1,42.
A fraxilidade do punta cedido polo Sevilla canta no rexistro acumulado, onde o seu total de remates queda en 68 fronte aos 80 do seu excompañero Juan Muñoz, quen apenas pasou tempo de baixa no Alcorcón. Entre os dez mellores da competición en cada media cóase tamén Quique González, compartindo un cúmulo de oportunidades gozadas que desde hai un tempo non soben ao marcador.
Non hai máis que sacar as contas das tres últimas citas para cifrar a magnitude do problema. 56 disparos. 19 a porta. Un gol. De Carlos, de penalti. As vistas non melloran se se engade o partido co Cádiz (16 tiros, 5 entre os tres paus) e só gañan ao incluír o exercicio de efectividade dA Romareda, onde o Dépor venceu co seu único chute cara á rede. A efectividade branquiazul hase esfumado no peor momento -tamén estivo entre os factores que acabaron con Natxo- e tocou chan en Elxe. «Tivémolas de todas as cores», esgrimiu Marí. Antes, Val: «Se agora nos pomos a pensar que non temos gol, malo». Pero ante o Córdoba hai que marcar, e os datos están aí.