Invita a esquecerse da vitoria ante o Mallorca para centrarse no Elxe: «Iso está pasado, non entra dentro dos nosos plans»
01 jun 2019 . Actualizado á 11:37 h.«Falamos dun partido tremendamente importante. O máis importante de todos porque é o que nos toca xogar». Todas as roldas de prensa de José Luis Martí arrincan do mesmo xeito. As comparecencias do técnico do Deportivo empezan a resultar calcos exactos da anterior, independentemente do rival e o momento. Esta vez só fixo unha breve concesión de sete palabras: «Estamos coa moral polas nubes». Situación que, segundo defendeu o adestrador, pouco ten que ver coa sufridísima vitoria fronte ao Mallorca porque «iso está pasado, non entra dentro dos nosos plans. Hai que saber que nos enfrontamos a un rival moi difícil de bater no seu estadio, que combina moi ben e que nos vai a pór as cousas moi complicadas».
Un adversario sen aliciente clasificatorio xa que ten asegurado desde hai tempo o obxectivo da permanencia. Con todo, Martí asegurou que os alacantinos sairán con ganas ao duelo: «Ao final son profesionais, van querer quedar o máis arriba posible. A profesionalidade no mundo do fútbol é a de querer disputar os partidos coa máxima intensidade». Fronte a iso, a fame do Dépor. «Sei que os meus xogadores se van a empregar ao cento vinte por cen. Teñen que dar o máximo durante os noventa minutos Está claro que sabemos o que nos xogamos», sostivo o adestrador dos coruñeses, aclarando que a idea non cambiou desde a súa chegada: «Imos sempre a polo partido. A nosa filosofía é esa. Daquela o rival tamén xoga». A partir de ahi, retomou a súa reflexión acerca do presente e o pasado: «Intentei transmitir aos xogadores que o sucedido ante o Mallorca non nos serve para xogar contra o Elxe. Necesitamos os tres puntos seguintes, os outros xa están sumados».
Martí referiuse tamén ás particularidades dunha xornada nas que o Deportivo xogará ao mesmo tempo que os seus rivais por unha praza de promoción. «Nós temos que facer o que temos que facer, no demais pouco podemos influír», manifestou, asegurando que non prestará atención ao desenvolvemento doutros encontros. «Vou intentar estar pendente do que realmente me preocupa. Pouco vai cambiar a nosa idea o que suceda noutros campos», destacou.
En canto á recente visita de Paco Zas, o adestrador dos coruñeses detallou que o novo presidente acudiu a Abegondo para «transmitir un pouco o que todos queremos, que é o ben do club. O que nos une a todos é que o Deportivo gañe»
