Do Pozo celebra o traspaso de Sidnei porque o seu soldo en Segunda «era unha barbaridade»
TORRE DE MARATHÓN
O responsable da área deportiva pide desculpas por un comentario que ofendeu ao gardameta nixeriano Francis
03 ago 2018 . Actualizado ás 18:25 h.O director deportivo do RC Deportivo, Carmelo do Pozo, considerou «satisfactorios os números» do traspaso do brasileiro Sidnei Rechel ao Betis.
O responsable da área deportiva do club galego admitiu que se produciu unha «perda de valor económico» respecto ao traspaso que o Deportivo pechara en xullo co Krasnodar (uns seis millóns de euros) e que non frutificou por diferenzas entre os axentes do defensa e do equipo ruso.
«O valor (da venda ao Betis) parécenos importante porque computamos o traspaso e o que liberamos (soldo) este ano e o que vén, porque Sidnei era o único xogador que non baixaba o valor de Primeira a Segunda División e en Segunda era unha barbaridade», aclarou o director deportivo.
Afirmou que os «números son moi satisfactorios» tendo en conta, ademais, «o percorrido que tivo» o xogador no Deportivo.
Do Pozo tamén explicou que está pendente «de dous ou tres xogadores» e o club está «preparado» por se xorden «opcións interesantes no económico» para poder «compensalo no deportivo».
Desculpas públicas para Francis
Ademais, pediu «desculpas» por unha frase que pronunciou esta mesma semana na súa anterior rolda de prensa: «Os xogadores non se teñen que esquecer que no seu momento o Deportivo apostou por eles e púxoos no escaparate, algúns con traspasos, outros traéndolles doutra categoría, outros traéndolles de África que non tiñan nin roupa e viñeron».
«Houbo unha frase en concreto que puido dar lugar a algunha malinterpretación, talvez foi un pouco esaxerada, así que á persoa implicada pedinlle desculpas nese momento e entendeu que o mesmo foro no que se produciu o normal é que se comunicase por se algunha persoa máis se puidese sentir ofendida», expuxo este venres.
A frase polémica sentou mal ao porteiro nixeriano Francis Uzoho, que tras ter disputado o Mundial de Rusia como titular coa súa selección será o terceiro porteiro do primeiro equipo do Deportivo e xogará coa súa filial en Segunda B.
«Ao día seguinte falei con el, deille as miñas explicacións e desculpas, ten unha situación difícil e todos intentamos axudar. Non cambiou a nosa idea desde o primeiro día e non vai cambiar», sinalou o responsable da área deportiva.