«De aquí non se vai a ir ningún xogador só porque el queira» explicou, á vez que expresou a súa idea de que Borja Valle, Borges e Fede permanezan no equipo
31 jul 2018 . Actualizado á 16:39 h.Aínda que pasen as semanas e o inicio da competición aproxímese, Carmelo do Pozo móstrase firme nas súas ideas. «De aquí non se vai a ir ningún xogador só porque el queira», asegura o director deportivo branquiazul. E con esta premisa empezou a analizar os diferentes casos que se dan a día de hoxe no club coruñés.
Entende que aínda haberá «tres ou catro saídas de futbolistas que están na mente de todos», que serán cubertas con outras tantas entradas. Son casos de Sidnei, Guilherme ou Albentosa. Pero mesmo nestas situaciónes é firme. «Para que leven a cabo as operacións, as tres partes teñen que poñerse de acordo: club que vende, club que compra e xogador». Outro que entende que podería saír é Krohn-Dehli. Pero neste caso, case o deixa en mans do xogador: «Deportivamente, está integrado aquí, pero ten a familia fóra... Aí pódense dar dúas circunstancias, que atope un destino preto da súa familia ou que economicamente lle compense o esforzo. Neste caso falariamos e entenderiámolo».
Máis convencido de que poden permanecer no Deportivo está Carmelo do Pozo nos casos de Borja Valle, Celso Borges e Fede Cartabia. E analizou as súas situacións. Tras advertir que «non é momento de afrontar renovacións de contrato» explicou que Borja aos poucos vaise dando conta de que a situación é óptima para el, que o seu gran desexo é que Celso Borges continúe, «aínda que ten propostas moi importantes e estase portando como un señor», e que Fede Cartabia «tamén o vexo coa idea de quedarse». A partir de aí entende que «hai unhas cláusulas, uns contratos e o fútbol pódeche permitir que calquera poida irse», aínda que está seguro que «todo aquel que estea aquí o 12 ou 15 de agosto será con compromiso».
Para rematar tamén se referiu ao caso de Francis, do que insistiu en que ten que ter claro que non pode ser segundo porteiro do Deportivo porque «se perderá moitos partidos por concentracións coa súa selección e a Copa África e iso prexudicaría ao equipo».