Dirixirá a contenda o murciano José María Sánchez Martínez, con quen o Deportivo presenta un historial de dúas vitorias, un empate e dúas derrotas
30 nov 2017 . Actualizado á 16:05 h.Este sábado a partir das 18:30 o Deportivo (17º, 12 puntos) visita ao Sevilla (5º, 25 puntos) no estadio Ramón Sánchez-Pizjuán, un escenario onde non gaña en Liga desde hai dez tempadas, en 2007/08, cando levou o triunfo por 0-1, acumulando desde entón tres empates e catro derrotas.
En caso de derrota branquiazul, dous futbolistas acadarían cifras curiosas: por unha banda, Fernando Navarro podería chegar a cincuenta partidos sen gañar en Primeira división como deportivista (leva 49, con 26 empates e 23 derrotas), mentres que Juanfran Moreno chegaría ás cincuenta derrotas oficiais co conxunto herculino.
No bando sevillista o protagonismo individual repártenllo Éver Banega e Michael Krohn-Dehli. O arxentino é o futbolista con máis enfrontamentos ante o Deportivo en Primeira división sen perder nunca (once, con oito vitorias e tres empates), mentres que o danés tratará de prolongar a súa curiosa marca de 19 vitorias consecutivas como local no campionato ligueiro, o que xa é unha marca na historia do club hispalense na elite.
En materia de efemérides, o 2 de decembro non supón un aliciente especialmente positivo para os coruñeses, que presentan un balance dunha vitoria e catro derrotas nesta data, incluíndo unha goleada por 5-1 sufrida ante o Sevilla no ano 1956; no entanto, cabe dicir que esa foi a última vitoria do equipo de Nervión no 2 de decembro, cultivando desde entón dúas igualadas e tres derrotas.
308 futbolistas defenderon a camiseta do cadro coruñés fronte ao Sevilla na historia de Primeira división, con Fran González e Manuel Pablo encabezando o ránking tras dezasete aparicións cada un, superando as dezaseis que protagonizaron Sergio González e Juan Carlos Valerón. No apartado goleador tamén figura Fran en primeira posición, con sete tantos, dous máis que os anotados por Roy Makaay.
Dez xogadores participaron nos encontros entre herculinos e sevillistas na máxima categoría con ambos os conxuntos: Marcelino «Campanal», Manuel Díaz «Liz», Fernando Navarro, Santos Bedoya, Carlos Marchena, Nando Martínez, Héctor Berenguel, Alfredo Santaelena, Bebeto e Aldo Duscher, dos cales, unicamente Manuel Díaz «Liz» marcou para os dous equipos -cinco tantos para os hispalenses por un para os galegos-.
Ademais de todos os citados, outros dez futbolistas chegaron a xogar en Primeira división tanto con Deportivo como con Sevilla: Alejandro Arribas, Antonio Arenas, Arsenio Iglesias, Francisco Gallardo, Gaël Kakuta, Luis Alberto Romero, Luis Miguel Ramis, Manuel Idígoras, Marcos Vales e Ricardo Serna.
Dirixirá a contenda o murciano José María Sánchez Martínez, con quen o Deportivo presenta un historial de dúas vitorias, un empate e dúas derrotas na máxima categoría, sendo o precedente máis recente a derrota por 2-6 fronte ao Real Madrid o pasado mes de abril; por parte sevillista, o seu único encontro ás ordes de Sánchez Martínez data de outubro de 2015, cando caeu 2-1 en Vilarreal.
Non hai baixas por sanción para este encontro en ningún dos dous bandos. Cristóbal Parralo recupera para este encontro a Guilherme dos Santos e Luisinho, que cumpriron sanción a pasada xornada, mentres que ten apercibido por acumulación de cartóns a Fede Cartabia, que se resulta amoestado perderase a cita da próxima xornada ante o Leganés.