Luis Enrique prescinde de Aleix Vidal na convocatoria para o partido do Camp Nou
15 oct 2016 . Actualizado á 12:29 h.O dianteiro arxentino Leo Messi, o centrocampista croata Ivan Rakitic e o central francés Samuel Umtiti recibiron a alta médica e entraron na convocatoria para o partido ante o Dépor no Camp Nou (16.15 horas), mentres que o lateral Aleix Vidal volve quedarse fóra da convocatoria por decisión técnica.
Luis Enrique recupera aos tres futbolistas, pero mantén outras baixas por lesión; non poderá contar co lateral Jordi Alba, cunha elongación no bíceps femoral da coxa esquerda que se produciu nos primeiros minutos do partido ante Italia, co polivalente Sergi Roberto, que nun dos adestramentos do combinado de Julen Lopetegui sufriu unha elongación no aductor da perna dereita, nin co porteiro holandés Jasper Cillessen, lesionado tamén coa súa selección.
Ademais, o técnico asturiano descartou por sétima ocasión consecutiva ao lateral Aleix Vidal, que non conta nos plans desta tempada.
A lista completa fórmana Ter Stegen, Masip, Piqué, Rakitic, Busquets, Denis Suárez, Arda Turan, Iniesta, Luis Suárez, Messi, Neymar, Rafinha, Mascherano, Paco Alcácer, Digne, André Gomes, Umtiti e Mathieu.