Bodipo marcou o único gol do último Alavés-Dépor, xogado hai dez anos, no que se despediu do equipo vasco antes de iniciar a súa etapa na Coruña
19 sep 2016 . Actualizado á 17:28 h.O Dépor volve a Mendizorroza dez anos despois cunha conta pendente. Alí resolveu oito tempadas consecutivas de idilio coas competicións europeas. Na recta final daquel partido, marcou Bodipo, que disputaba a súa segunda campaña no Alavés e uns meses despois se enfundaba a camiseta do Dépor. «Foi un día tráxico para a afección do Alavés, porque se consumou o descenso. Marquei no minuto 78, quedabamos en Primeira e cumpríase o tempo en Montjuich. Alí xogaba o Espanyol-Real Sociedade, pero Corominas no 93 marcou e pasamos da euforia ao silencio sepulcral. Coa derrota, o Dépor tamén quedaba fóra da Intertoto. Era un equipo que levaba moitos anos xogando en Europa, pero quedaba sen esa posibilidade», lembra Bodipo, que no Alavés-Dépor desta noite (20.45 horas, beIN LaLiga) sabe perfectamente a quen animará.
«No Alavés tratáronme moi ben e foron dous anos da miña carreira, pero eu teño o corazón deportivista e recreativista», di en relación tamén ao Recreativo de Huelva, que lle abriu a porta á elite. «Deséxolle o mellor ao Alavés, de volta en Primeira, porque ten que estar aí, pero son deportivista de corazón», engade mentres se desfai en eloxios pola afección. «Na miña carreira pasoume que algúns clubs que estaba a gusto no campo, logo non tanto na cidade. En cambio, na Coruña foi ao revés, estaba feliz na cidade, pero non tanto cos resultados do campo», indica en relación aos seus sete anos (2006-2013) en Riazor. «É verdade que no Dépor podía dar moito máis, no sentido de máis goles, pero fixen todo o que estaba na miña man profesionalmente. Ninguén me pode achacar nada, era o primeiro en chegar e o último en irme. Traballaba ata en días libres. Teño que ter a conciencia tranquila», afirma despois de acordarse da grave lesión de ligamento cruzado que padeceu ao comezo da súa estancia: «Truncoume, porque eu era un xogador moi potente e custoume coller esa potencia e faísca de novo».
Bodipo adestra actualmente na Escola Internacional do Barcelona e é comentarista de Canal Sur. «Viaxo por todo o mundo adestrando naqueles lugares onde o Barça ten escolas. Tamén estiven de prácticas nas categorías inferiores do Sevilla e con Oltra no Recre. Aos poucos voume formando. Estiven practicamente por toda Italia, en Venecia, Pescase, Perugia,.. En Croacia, en Buenos Aires, tamén na escola que hai na Manga do Mar Menor... fixen moitos quilómetros este verán», explica, aínda que recoñece que aínda ten pendente o regreso á Coruña: «Hai que ser persoa antes que futbolista. A afección viume como fun e, por iso, a día de hoxe aínda teño a miña pena, que en outubro abre unha nova sede. Pode ser que me achegue, aínda que me dá moita nostalxia».