A plataforma, que subirá ata un 18 % a subscrición en Norteamérica, asegura que as tarifas «son específicas de cada país»
04 jun 2019 . Actualizado ás 15:09 h.Acabouse o choio: Netflix incrementará entre un 12,5 % e un 18,2 % as súas tarifas nos Estados Unidos e nalgúns países latinoamericanos que facturan en dólares, segundo confirmaron a Europa Press fontes da compaña. O que pasará en España é, de momento, unha incógnita. «As subidas de prezos son específicas para cada país e a dos Estados Unidos non inflúe nin indica un cambio dos prezos en España», acougou os ánimos un portavoz da multinacional. Está claro, con todo, que a plataforma pisou o acelerador.
En concreto, Netflix subirá un 12,5 % a tarifa do seu servizo básico nos Estados Unidos, ata 9 dólares ao mes, mentres que o plan estándar HD, o máis popular entre os ofrecidos pola compaña, subirá un 18,2 %, ata 13 dólares mensuais. O plan premium pasará a custar 16 dólares ao mes, un 14,3% máis do que custaba ata agora.
A subida, a cuarta no caso das súas tarifas nos Estados Unidos e a máis significativa desde a súa fundación hai 12 anos, disparou este martes a cotización das accións de Netflix na Bolsa de Nova York, onde chegaban a subir un 6,77 %. Os novos prezos para os Estados Unidos entrarán xa en vigor para os novos subscritores. Os actuais abonados da plataforma recibirán unha notificación vía correo electrónico, así como a través da app, durante os 30 días anteriores á revisión á alza da súa tarifa actual.
Ao peche do terceiro trimestre, Netflix contaba cun total de 58,46 millóns de usuarios nos Estados Unidos, dos que 56,96 millóns, máis do 97 %, eran subscritores de pagamento. De cara ao 2019, a compaña prevía acadar os 60,26 millóns de usuarios en EE.UU., cun total de 58,46 millóns de abonados de pagamento.
En España, a falta de cifras oficiais por parte da compaña, os últimos datos do Panel de Fogares elaborado pola Comisión Nacional da Competencia (CNMC) correspondente ao segundo trimestre do 2018 destacou que Netflix conta con dous millóns de fogares abonados.
Segundo este informe, un de cada tres fogares con conexión a Internet conta con plataformas de pagamento para ver contidos audiovisuais a través de Internet. A máis popular é Movistar+, con 2,2 millóns de fogares usuarios, seguida por Netflix, Vodafone TV online (950.000) e Orange TV (741.000), aínda que os usuarios das distintas operadoras poden ter ou non acceso aos contidos doutras plataformas.
A proba o abono semanal
Netflix, que é a plataforma de streaming con maior implantación e que chega a 190 países, ofrece en todos os mercados a modalidade de subscrición mensual, pero recentemente empezou un período de probas con carácter limitado para estudar a opción de introducir un abono semanal. Por un prezo menor e un compromiso de só sete días, a compaña proba esta modalidade en Austria e valorará a súa implantación en función dos resultados. A opción semanal ofrece, como a mensual, tres opcións: unha con calidade estándar e para un dispositivo por 2,49 euros; outra con maior resolución para conectar dúas pantallas, por 2,99 euros; e unha terceira, para catro pantallas, por 3,99 euros.