A miniserie «Cormoran Strike» adapta as historias do detective creado pola autora de Harry Potter
18 may 2018 . Actualizado ás 07:42 h.Cando J. K. Rowling decidiu que había vida máis aló de Harry Potter, púxose a escribir novela negra para adultos protexendo o seu nome baixo o pseudónimo de Robert Galbraith. Así naceu a serie de libros Cormoran Strike, que toma o seu nome do detective londiniense que os protagoniza. O canto do cuco foi a primeira destas obras, seguida do verme de seda e O oficio do mal. Con todas elas HBO realizou unha miniserie de sete capítulos que chega este venres á plataforma.
A serie ten como protagonista ao actor inglés Tom Burke a cargo do papel principal, para o cal tivo que caracterizarse con varios quilos de máis e unha soa perna, pois Strike é un veterano de guerra con numerosas cicatrices físicas e emocionais reconvertido en investigador privado que ten o seu cuartel xeral nunha pequena oficina da rúa Denmark Street, en Londres.
A súa intuición e o seu pasado como investigador militar resultan claves para a resolución de tres casos que puxeron en xaque á policía. Holliday Grainger (Os Borgia) comparte protagonismo no papel de Robin Ellacott, a súa nova asistente.
A serie arrinca con tres episodios dunha hora baseados no primeiro libro da triloxía, O canto do cuco, dirixidos por Michael Keillor, aos que seguen outros catro, que adaptan os volumes O verme de seda, dirixido por Kieron Hawkes, e O oficio do mal, dirixido por Charles Sturridge.