A serie contará cos actores Roselyn Sánchez e Demian Bichir e terá a Eva Longoria como produtora executiva
24 mar 2018 . Actualizado á 05:00 h.A rodaxe do episodio piloto da versión estadounidense da serie española Gran Hotel acaba de comezar en Miami Beach coa presenza de actores como Roselyn Sánchez e Demian Bichir e da súa produtora executiva, Eva Longoria.
A filmación, principalmente de exteriores, realízase nas instalacións do icónico hotel Fontaineblue Miami Beach, considerado unha das xoias arquitectónicas da cidade desde a súa construción, en 1954.
Fontes da produtora indicaron que Grand Hotel, terceira versión do éxito de Antena 3, que comezou a emitirse no 2011 e da que se completaron tres tempadas, está ambientada nas costas atlánticas da cidade de Miami Beach na época actual (na orixinal é a comezos do século XX) e presenta tamén cambios no que se refire aos personaxes.
A portorriqueña Roselyn Sánchez encarna a Gigi, descrita como a representación de todo o «encanto de Miami», e o mexicano Demian Bichir é o seu esposo e o dono do hotel onde se desenvolve a trama.
Ambos os actores traballaran en producións anteriores con Longoria, quen ademais incorporou ao cantante e actor cubano-estadounidense Jencarlos Canela.
A parella principal
A parella romántica, que na versión española foi interpretada por Amaia Salamanca e Yon González, esta vez correrá a cargo de dous actores virtualmente descoñecidos para o mercado estadounidense: o australiano Lincoln Younes e Denise Tontz.
O episodio piloto está a ser dirixido por Ken Olin, artífice da exitosa serie This is Us. O equipo traballou durante días na área da piscina principal do hotel para gravar varias escenas, así como outras salas do edificio, que esta fin de semana tamén servirán de escenario para actividades do festival de música electrónica Ultras.