Augas de Galicia reclama a Transición Ecolóxica analíticas adicionais que confirmen que os nitratos da auga proceden de fontes gandeiras
GANDERÍA
Nun escrito remitido á Dirección Xeral da Auga argumenta que existen once puntos da demarcación hidrográfica Galicia-Costa onde non hai certezas de que a contaminación non proceda de núcleos urbanos ou polígonos. Reclama a elaboración dun novo mapa de zonas vulnerables en base a eses novos estudos, que tamén está a facer a comunidade
01 abr 2025 . Actualizado á 18:55 h.O tempo aprema porque a comunidade galega ten este ano para declarar as zonas vulnerables a nitratos recollidas no mapa de augas contaminadas que confecciona o Ministerio de Transición Ecolóxica, en base ás analíticas realizadas durante catro anos en distintos puntos para cumprir co que establece a directiva comunitaria 91/676/CEE, relativa á protección das augas contra a contaminación producida por nitratos utilizados na agricultura. Pero antes de ser declaradas por parte da Consellería do Medio Rural, a Xunta quere estar segura de que efectivamente a contaminación por nitratos recollida nas analíticas nas que se basea o mapa procede de fontes agrogandeiras. Por iso, Augas de Galicia, organismo dependente da Consellería do Medio Ambiente e competente no control das augas da demarcación hidrográfica Galicia-Costa, acaba de remitir un escrito á Dirección Xeral da Auga, dependente do Ministerio de Transición Ecolóxica e Reto Demográfico, no que solicita que se realicen estudos complementarios que confirmen que efectivamente a contaminación por nitratos detectada nos puntos analizados procede de «modo sgnifcativo» de fontes agrogandeiras. No escrito faise especial fincapé en acreditar que o nivel de contaminación «sexa sgnificativo» apelando a unha sentenza do Tribunal de Xustiza da Unión Europea do 14 de marzo do 2024, na que se absolve a Galicia de declarar zonas vulnerables e que fixaba a obrigación de acreditar que os compostos nitroxenados de orixe agrogandeira «contribúen de xeito sgnificativo» á contaminación por nitratos nos puntos analizados.
O escrito remitido ao Ministerio por Augas de Galicia fai especial referencia a once puntos de recollida de analíticas distribuídos en zonas como Caldas-O Salnés, Carral-Cerceda, Bertamiráns (Ames); O Morrazo, Pontevedra, Vigo, Baiona, Ulla, Tambre ou Costa da Morte onde non hai suficientes certezas que acrediten que, segundo Augas de Galicia, a contaminación procede de fontes gandeiras. Ao mesmo tempo desde ese departamento de Medio Ambiente lembran que confirmar que a contaminación por nitratos procede da gandería é fundamental para reducila no futuro, dado que as medidas correctivas que deberá recoller o plan de intervención en zonas vulnerables (hai dous anos para elaboralo unha vez que estas áreas estean decretadas) só afectarían a ese sector.
Augas de Galicia, como lembra ao Ministerio no escrito, tamén está a realizar analítias adicionais para contrastar os argumentos expostos, asegurando que se toman as medidas correctas.