Legalizan miles de galiñeiros para seguir comprando pitos: «Creo que a xente vai deixar de ter galiñas»
GANDERÍA
Donos de currais víronse obrigados a dar de alta as súas instalacións para poder renovar a súa cabana
08 mares 2024 . Actualizado ás 21:58 h.En Galicia hai miles de galiñeiros de autoconsumo. Aínda que resulte difícil calcular cantos, basta con dicir que hai case 41.000 dados de alta pola obrigatoriedade de rexistrar os currais con menos de 30 aves. A cifra seguirá crecendo previsiblemente, ben con trámites efectuados ante as oficinas rurais da Xunta, ben con inscricións tramitadas por Internet. Entre as primeiras, ademais, hai persoas que actúan como representantes doutras.
Como explica Manuel Calvo, portavoz da recentemente constituída Asociación de Tendas Agrarias de Galicia (Atiga) e propietario dun establecemento no municipio de Santa Comba, xente maior que en moitos casos vive soa e con pouco dominio de técnicas dixitais delega en donos de negocios o trámite do rexistro do galiñeiro. Mentres tanto, persoas que realizaron a inscrición comentan que o trámite non lles ocupou moito tempo, pero dubidan da eficacia real. Orsita Sierra , veciña de Abadín, lanza un prognóstico pesimista: «Creo que a xente vai deixar de ter galiñas», di.
«Fálase de enfermidades, pero nunca tiven ningún problema», asegura Jesús Roca, veciño de Guitiriz . Xa deu de alta o seu galiñeiro, no que ten doce galiñas. A cría de aves é para el unha actividade tradicional: desde a súa nenez estaba habituado a que na súa casa houbese aves, deixou de telas e recuperounas hai pouco. «Téñoas para pasar o tempo e para comer bos ovos», di con algo de humor.
O trámite da alta do galiñeiro ocupoulle só uns minutos na oficina rural de Guitiriz. Cre que a xente non deixará de coidar os seus currais polo problema que supoña inscribilos, xa que, di, un galiñeiro de autoconsumo ofrece vantaxes indubidables: «Os ovos da casa saben mellor», afirma. As súas galiñas toman unha mestura de cereal (trigo, cebada, millo) e nada de penso, ademais do que atopan cando están ao aire libre: «Andan por fóra, comén tamén algo de herba», explica este guitiricense.
«Crío as galiñas para ter ovos de confianza»
Orsita Sierra , de Abeledo (Abadín), tamén deu de alta o seu galiñeiro. Para ela, que acudiu á oficina de Vilalba, os trámites foron máis sinxelos, xa que pola súa dedicación á gandería (ten vacas) contaba xa cun código de identificación da súa explotación. Desprazouse á capital chairega hai días, pero aínda agarda que lle dean un número oficial, como explicaba este mércores.
Como noutros moitos casos, a súa cría de galiñas é unha cuestión de tradición e de costume, non de negocio. «Téñoas de sempre, para consumo propio. É algo de toda a vida, para ter ovos de confianza», di. Ela si lles dá ás aves un pouco de penso, aínda que os cereais e un pouco de herba son a base da alimentación. As galiñas adoitaban pasar case todo o día ao aire libre; «agora, non tanto, porque as come o raposo», explica
Esta veciña de Abadín, que tamén se dedica á agricultura e é unha habitual vendedora da feira Expogrelo, dubida un pouco da eficacia destes rexistros. «Non sei para que será», opina. Recoñece que a gripe aviaria pode supor un problema, pero quéixase de que á poboación rural déronselle poucas explicacións. «Creo que moita xente deixará de ter galiñas», comenta. Ela, de todos os xeitos, tramitou a alta do seu galiñeiro porque é un trámite necesario para poder comprar novas aves.
Os donos de tendas piden claridade á Xunta
A recentemente constituída Asociación de Tendas Agrarias de Galicia (Atiga) reclama claridade sobre a situación que haberá de agora en diante. Aínda que o goberno está en funcións, agarda que cando se forme o novo executivo haxa unha reunión. Manuel Calvo, portavoz dun colectivo ao que xa se adheriron máis de 200 negocios de toda Galicia, subliña que a entidade debe ser tida en conta e escoitada pola Administración.
A asociación quere saber se levarán a cabo inspecciones e que se observará nese caso, pero tamén considera necesario despexar sobre todo a sensación de incerteza que hai estes días. «Que se lle quite o medo á xente», agrega Calvo. O real decreto aprobado polo Ministerio de Agricultura, contra o que a Xunta presentou máis de 40 alegacións e viu que todas eran rexeitadas, remite á Lei de Benestar Animal para posibles sancións, e nesa norma recóllense multas de polo menos 600 euros.