Unha explotación de Guitiriz aposta por envasar e distribuír a produción das súas vacas
GANDERÍA
Tras pasteurizarla e envasarla, fan a repartición por Teixeiro, Guitiriz, Vilalba, Lugo, Xermade e distintos puntos da comarca da Mariña
08 dic 2023 . Actualizado ás 18:33 h.O leite consumido a pouca distancia do lugar de produción non é só un recordo para as persoas de certa idade nin un privilexio de mercados exclusivos. Unha explotación do municipio de Guitiriz, Casa Arxá, iniciou fai uns tres anos o proceso de envasado e de distribución do leite das súas vacas; e o resultado é o funcionamento de dúas liñas de repartición que colocan a mercancía en Lugo, na Terra Chá e en .. A Mariña
O comezo tivo máis que ver coa presenza de circunstancias propicias que coa aparición dunha súbita idea. José Díaz Ansede, responsable da explotación, explica que levaba tempo con esa aspiración, e a compra da maquinaria dunha explotación de Ortegal que se dedicaba ao envasado de leite fresco foi a forma de conseguila.
O sistema encerra poucos segredos. As vacas se ordeñan dúas veces ao día, pola mañá e pola noite, e os dous leites mestúranse logo. Así, afirma o gandeiro, iguálase a calidade e garántese un sabor homoxéneo. O leite sae da sala de ordeño ao tanque de frío. Logo pasa á máquina pasteurizadora, onde sobe a 71 graos e baixa a dúas; despois acaba na envasadora, onde se mete en envases de plástico.
A produción se envasa ao día seguinte, e logo sae a furgoneta, que alterna as dúas rutas de distribución do produto: un día empeza en Teixeiro (A Coruña), segue por Guitiriz e por Vilalba e acaba en Lugo; outro se mete por Xermade e continúa cara a Viveiro e outras localidades mariñás. A explotación ten ao redor de 40 vacas; a produción sitúase entre os 300 e os 400 litros diarios e comercialízase en envases dun e de dous litros.
O réxime da explotación, comenta o gandeiro, é similar ao dunha gandería con selo ecolóxico, posto que as vacas se moven con liberdade do cortello ás leiras, o que reduce o estrés e actúa de modo eficaz contra algunhas enfermidades. Doutra banda, a alimentación céntrase no pasto, con pouco consumo de silo. O resultado, agrega José Díaz Ansede, é un leite rico en omega 3 e con poucas graxas saturadas. «O produto sae natural ao 100 %», afirma.
De todos os xeitos, o responsable da granxa admite que é un modelo válido para explotacións cun pequeno tamaño e non para as grandes, xa que, sostén, nestas o manexo do gando entre o cortello e as parcelas entraña máis dificultade. Tamén recoñece dificultades, xa que o contacto con clientes e a preocupación pola distribución son situacións habituais. No entanto, a satisfacción predomina, pois mesmo proxecta ampliar o negocio á produción de iogur e de queixo fresco.