Abren inscricións para unha nova formación sobre deseño de parcelas con criterios de agricultura rexenerativa

A Fundación Juana de Vega mantén aberto o prazo de inscrición para a xornada técnica «Deseño dunha parcela agrícola e gandeira seguindo os criterios da agricultura rexenerativa», unha formación online e gratuíta de 7 horas de duración. A actividade realizarase en dúas sesións de mañá, de 9:30 a 13:00 horas, o venres 25 e o mércores 30 de abril. O número de prazas está limitado a 15 participantes.

O curso será impartido por Robert Madeo Salvá, membro de The Regen Academy, unha entidade internacional especializada na formación e asesoramento en agricultura rexenerativa. A proposta forma parte do programa conxunto de «Xornadas e seminarios técnicos para o impulso da agricultura rexenerativa e sostible», desenvolvido pola Fundación Juana de Vega e a empresa Agroassesor (Girona), con actividades en Galicia e Cataluña.

O programa conta cun financiamento de 104.823,6 euros por parte do Ministerio de Agricultura, Pesca y Alimentación, a través das novas axudas para «Intercambio de conocimientos y actividades de formación e información de ámbito supraautonómico, destinadas al sector agroalimentario y forestal». A proposta presentada pola Fundación Juana de Vega recibiu a terceira mellor puntuación na súa área temática dentro da convocatoria.

Desde marzo de 2024 e ata xuño de 2026, desenvolveranse un total de doce actividades formativas dirixidas a técnicos, asesores e produtores agrarios, co obxectivo de promover un cambio cara a sistemas de produción máis respectuosos co medio e economicamente viables.

Esta será a terceira actividade organizada pola Fundación dentro desta liña de acción. En febreiro de 2024 celebráronse na Coruña as I Xornadas Científico-Técnicas sobre Xestión Rexenerativa, e en outubro de 2024 organizouse un curso de tres días co experto colombiano en agricultura orgánica Jairo Restrepo.

 

 

 

 

---

---

---