A comunidade dedica menos superficie aos cereais e máis aos forraxeiros
17 ene 2024 . Actualizado ás 09:32 h.O Ministerio de Agricultura fixo pública a Enquisa sobre Superficies e Rendementos de Cultivos (Esyrce), que se realizou entre maio e setembro do pasado ano en todo o territorio nacional. Nela pódese comprobar que Galicia non é allea ás tendencias nacionais, onde se detecta un lixeiro descenso nos cultivos herbáceos, mentres que crecen lixeiramente os leñosos. A diferenza do resto do país, en cambio, na comunidade aumenta a aposta por cultivos industriais, con colza e girasol á cabeza.
Segundo o informe elaborado por Agricultura, o descenso nos cultivos herbáceos débese a que os agricultores españois plantaron menos cereais e cultivos industriais, ademais de forraxeiros, tubérculo e hortalizas. Porque o único grupo que aumenta superficie con respecto ao pasado ano son as leguminosas de gran. En Galicia, pola contra, ademais dos cereais caen tamén as leguminosas, pero crece en cambio a extensión que ocupan os tubérculos, as forraxeiras e os cultivos industriais.
Desta forma, na comunidade hai 28.974 hectáreas de cereais, case catro mil menos que no 2022, sendo o trigo brando o que máis superficie perde. A nivel xeral, o ministerio culpa á seca de que haxa menos arroz e millo que no exercicio anterior. E mentres no resto do país cultívanse cada vez máis leguminosas, animados talvez polas axudas da nova PAC que trata de incentivar estes cultivos, en Galicia só hai 753 hectáreas de xudías secas, corenta menos que no pasado exercicio. Os agricultores galegos seguen apostando polos tubérculos, dos que hai xa 11.365 hectáreas de pataca, duascentas máis que hai un ano.
Cultivos industriais
O gran crecemento experiméntano, sin duda, os cultivos industriais. Mentres no resto de España dedícase menos superficie a algodón, girasol ou colza, en Galicia pasáronse de 127 hectáreas de girasol a 361 e de 59 de colza a 647. Iso significa que hai xa 1.137 hectáreas dedicados a estes cultivos, fronte ás 186 do pasado ano. Crecen tamén os cultivos forraxeiros, sobre todo, debido ao aumento que rexistran as praderías e as coles e verzas. A superficie dedicada a millo, en cambio, diminúe nunhas mil hectáreas.
Descende, aínda que moi lixeiramente, o espazo que os agricultores galegos dedican a flores e hortalizas. E iso a pesar de que algúns dos cultivos máis importantes da comunidade dentro deste apartado rexistran un incremento da superficie. É o caso da leituga, o tomate, o pemento e as xudías verdes, ademais dos grelos, dos que hai catro hectáreas novas, ocupando este cultivo unha superficie total de 95 hectáreas. Pola contra, cae o espazo que ocupan o repolo e a cebola. O cultivo de flores ornamentais, en cambio, tamén crece considerablemente e Galicia pasou de ter 56 hectáreas a 261. Delas, a gran maioría (155 hectáreas) son baixo invernadoiro. Talvez tamén debido á configuración da nova PAC, que aposta polas terras de barbecho, España rexistra un aumento nesta superficie, ao que Galicia non é allea. Na comunidade hai 700 hectáreas máis, chegando xa ata as 17.736.
Outra superficie que aumenta en todo o país é a dos cultivos leñosos, debido sobre todo á expansión que experimentaron os froiteiros non cítricos como o pistacho e os tropicais, especialmente mango, kiwi ou aguacate. En Galicia hai mil hectáreas máis de cultivos leñosos que no 2022. Crecen moi lixeiramente os cítricos, que ocupan xa 181 hectáreas. Pero sobre todo aumentan os non cítricos, co manzano á cabeza. Este cultivo pasou de ocupar 1.135 hectáreas a máis de 4.500. Pola contra, o castiñeiro de froito, no que Galicia é toda unha potencia, segue perdendo superficie e queda en 11.803 hectáreas.
Outros dous cultivos que crecen son o viñedo, que pasa de 25.041 hectáreas a 25.466, e o oliveiral, que continúa a súa tendencia alcista e chega ás 61 hectáreas, freten ás 59 do exercicio anterior. Os viveiros, en cambio, rexistran unha caída de preto de cen hectáreas e quedan en 396. Para rematar, a comunidade ten 21.829 hectáreas de hortos familiares e 1.797.483 hectáreas de superficie forestal.