Os apicultores reclaman á Xunta a creación dun comité específico para a loita contra a velutina
SOMOS AGRO
As asociacións que participaron nun congreso en Chantada solicitan fondos para a investigación científica sobre a especie invasora
08 novs 2023 . Actualizado ás 09:20 h.As asociacións galegas de apicultores que participaron a pasada fin de semana en Chantada no primeiro congreso galego de control da velutina pedirán á Xunta a creación dun comité específico para loitar contra esta especie invasora. A decisión de presentar esta solicitude tomouse nunha reunión que levou a cabo durante as xornadas —organizadas pola Asociación Galega de Apicultura e o grupo de desenvolvemento local Miño-Ulla— na que tomaron parte representantes dos colectivos Abellas Nais, Agrupación Apícola de Galicia, Asociación de Apicultores dá Provincia de Pontevedra, Asociación Provincial Lucense de Apicultura , Asociación Valdeorresa de Apicultores e Casa do Mel, así como da indicación xeográfica protexida Mel de Galicia.
No comité cuxa creación propoñen estas entidades deberían participar transversalmente varias consellerías, a delegación do Goberno en Galicia, os concellos, as deputacións e representantes dos diferentes sectores agrarios afectados os ataques da velutina. Ademais dos apicultores —segundo indican— tamén están a ser prexudicados os sectores vitivinícola, frutícola e silvícola. Este órgano, engaden, «deberá estar expectante, receptivo e activo no estudo e na valorización de iniciativas e proxectos foráneos que poidan ser aplicables no ámbito da comunidade autónoma galega».
Aplicación informática
Doutra banda, as asociacións piden a creación dunha aplicación informática para transferir información entre a administración e a poboación en xeral con respecto aos avisos de detección e retirada de niños, así como á localización de trampas, «para axudar entre todos ao control e seguimento de actuacións e métodos do seu control por parte dos apicultores».
Outra petición que fan os colectivos apícolas é que se difunda entre os concellos, os apicultores e outros cidadáns a información sobre as intervencións de localización e retirada de niños de velutina realizadas durante este ano pola empresa pública Seaga para poder levar a cabo durante o 2024 accións de control «que sexan máis efectivas e eficientes». Doutra banda, estas entidades piden que se destinen presupostos para a investigación científica sobre esta especie e os métodos para controlala.
Doutra banda, as asociacións solicitan que as accións contra a velutina non se inclúan nas axudas anuais concedidas ao sector apícola «posto que estariamos en clara desvantaxe con respecto a outras comunidades autónomas que non teñen outra praga» e para que este labor social non recaia nos apicultores. No trampeo selectivo —agregan— «débense implicar directamente a Xunta, con medidas de prevención a través de Seaga, e os concellos».
Así mesmo, as entidades piden a elaboración dun plan piloto cun protocolo de accións de control e defensa das colmeas e o establecemento de axudas directas para loita contra a velutina destinadas o sector apícola galego, «dado que somos o sector primixenio do que dependen outros sectores como o agrícola, o gandeiro, a alimentación humana e a biodiversidade».