O presidente da Xunta, Alfonso Rueda, insistiu en Valdeorras na importancia de apostar polo enoturismo como complemento económico ao sector do viño
19 sep 2023 . Actualizado ás 19:10 h.As cinco denominacións de orixe vitivinícolas de Galicia —Valdeorras, Ribeiro, Monterrei, Ribeira Sacra e Rías Baixas— encaran a recta final da vendima, unha recollida da uva que este ano veu moi adiantada en todo o territorio polas condicións climáticas. Ao redor do 70 % da colleita está xa en adega, segundo os datos da Consellería do Medio Rural que deu a coñecer esta mañá o presidente da Xunta, Alfonso Rueda. Falou durante a súa visita á Rúa, onde primeiro visitou un viñedo no que se estaba traballando en Somoza e despois estivo na adega de Joaquín Rebolledo, unha das empresas emblemáticas da D.Ou. Valdeorras.
Nesta denominación de orixe este ano estase recollendo unha colleita maior que a do ano pasado. O motivo hai que buscalo en que hai unha maior produción e ademais as hectáreas amparadas creceron en cen máis que van ser vendimiadas por primeira vez. «A previsión é que sexa unha colleita duns sete millóns de kilos de uva», avanzou o presidente do consello regulador de Valdeorras, José Ramón Rodríguez. A estimación á alza é común en toda Galicia. Rueda apuntou a que as previsións apuntan a que a colleita «pode ser moi boa, incluso superando aproximadamente nun 6 ou 7% o vendimado o pasado ano», que se pechou cun balance final de máis setenta millóns de quilos cultivados.
Xunto a Rodríguez e o conselleiro do Medio Rural, José González, Rueda puxo en valor o sector. Lembrou que en Galicia hai ao redor de 500 adegas amparadas por un selo de calidade, ademais duns dez mil viticultores. Xuntos xeran un valor económico de produción en orixe de case 300 millóns de euros. E non hai teito. «Os nosos viños teñen cada vez máis aceptación no exterior», destacou. «A exportación é un camiño ao que todavía lle quedan moitas alegrías por darnos», remarcou. Tamén ligou o futuro do sector ao enoturismo, unha vía de negocio que cada vez se explota máis en Galicia pero que aínda está lonxe das cifras doutras rexións nas que tamén se fai un viño de calidade. «Por aí temos que seguir apostando. Nestes anos cos fondos Next Generation adicados a enoturismo podemos facer grandes cousas e que complementen o principal, que é que se fai un viño fantástico que forma parte da gastronomía de Galicia», insistiu Rueda .
Na visita estivo tamén a alcaldesa da Rúa, María González Albert, que agradeceu ao presidente da Xunta a súa visita á Rúa e a unha adega que é un emblema de Valdeorras, dixo. E engadiu: «A nosa denominación de orixe é un elemento integrador da comarca, de desenvolvemento económico e social que nos parece fundamental. Estamos nun momento doce, no que sobre todo a variedade godello está de moda e estase trasladar á vontade dos viticultores, que están elaborando un proceso de renovación, profesionalización e modernización do sector que creo que vai dar moitas alegrías para A Rúa».