A Xunta levanta a prohibición de plantar pataca en parroquias de Muxía e en Noicela, Carballo
SOMOS AGRO
Xa só figuran como infestadas Lendo e Caión, na Laracha, e as muxianas A Ou, Leis, Moraime, Ozón e Muxía
23 novs 2021 . Actualizado ás 21:30 h.A última actualización do estado da praga da couza guatemalteca en Galicia deixa boas noticias para a Costa da Morte, pois a comisión de seguimento ha levantado a prohibición de plantar pataca na parroquia carballesa de Noicela e en Bardullas, Buiturón, Caberta, Couceiro, Frixe, Morquintián, Nemiña, Touriñán e Vilastose, en Muxía, primeiro municipio afectado pola praga na comarca.
Esta decisión non implica que os produtores poidan actuar ao seu libre albedrío, xa que terán que informar a Xunta de todas as parcelas nas que cultiven o tubérculo, pero polo menos terán a posibilidade de sementalo, algo imposible en Muxía desde en 2018, cando Medio Rural detectou couza en seis almacenes de Ozón.
Na zona infestada, isto é, onde non se pode plantar pataca baixo ningún concepto, permanecerán as parroquias larachesas de Lendo e Caión, así como as muxianas da Ou, Leis, Muxía, Moraime e Ozón. Ademais, os operadores de pataca de sementa non poderán ter existencias nin comercializar este tipo de produto. Tamén se prohibe a saída do tubérculo de consumo da zona infestada excepto no caso de tránsito. Se ese fose o motivo, o vehículo deberá ir totalmente pechado cunha estrutura ríxida ou cunha lona protectora que impida calquera contacto co exterior.
A Xunta tamén actualizou o mapa da zona tampón, onde quen cultiven pataca deberán comunicalo ao ente autonómico. Ademais das restantes parroquias de Muxía e da carballesa de Noicela, anteriormente mencionadas, nesta área inclúese tamén unha franxa de 5 quilómetros ao redor dos puntos infestados. Isto afectaría a parcelas dos municipios de Camariñas, Dumbría e Vimianzo; así como ás parroquias carballesas de Rebordelos, Vilela e Noicela, así como a Lemaio e Torás, no concello da Laracha.
Deste grupo saen, no entanto, os municipios de Cee e Fisterra, oficialmente declarados «totalmente libres da praga» xunto con outros catorce concellos de toda Galicia, a maioría deles situados na provincia da Coruña.
Os datos obtidos das trampas en campo e en explotacións mostran un «avance significativo na contención desta praga de corentena», explica a comisión de seguimento da colza guatemalteca, o que sería «un paso previo a unha posible erradicación», explican.
No Concello de Muxía a praga foi detectada na primavera de 2018 e, desde entón, non se puido plantar o tubérculo en todo o municipio. No caso de Caión e Lendo (A Laracha), así como de Noicela (Carballo), estas parroquias foron incluídas na zona infestada a finais de 2019, tras a análise de diferentes trampas de campo e en explotacións. Ata o momento estaban en zona libre de praga.