Promocionan o consumo de carne de poldro criado na provincia, un produto que demanda Italia

Tras lograr a certificación de carne de poldro galego 100 % raza autóctona, desde a Asociación de Criadores de Cabalo de Pura Raza Galega (Puraga) envorcáronse tamén coa hostalería na promoción desta carne. O colectivo, integrado por unhas cen explotacións con máis de dez reses, continúa realizando xornadas de divulgación na Mariña lucense, unha zona onde, a diferenza doutras de Galicia, existe máis tradición de consumo deste produto.

Nesta comarca está unha das contadas carnicerías nas que se pode conseguir este artigo. Leira Loureiro de Burela é, xunto con Carnicería Montes de Lugo (con varios despachos) e Pin da Coruña, un dos establecementos de referencia que menciona Isabel Casariego, veterinaria de Puraga.

A poucos días de que comecen as Xornadas de Tapeo de Carne de Poldro, que se celebrarán en quince locais hostaleiros de Foz os días 30 e 31 de outubro, na Ponte dos Santos, Casariego asegura que ese tipo de actos inclúense na promoción que Puraga realiza para dar a coñecer o produto entre quen nunca o cociñou ou catado, e para invitar a quen o consumiu hai anos a recuperar ese hábito. Destaca entre outras propiedades da carne, que é de doado dixestión, baixa en graxa, alta en proteínas e moi rica en ferro.

Neste sentido, asegura que aproximadamente o 50 % dos gandeiros de Puraga están na provincia de Lugo, sendo o forte a zona do Xistral e arredores, de Viveiro a Mondoñedo. «Na Mariña hai tradición de consumir esta carne, pero no resto de Galicia non tanto. Se a isto se suma que hai poucas carnicerías, entendemos que é moi necesaria unha labor de divulgación», explica Casariego, que asegura que este produto é moi valorado e demandando en Italia, onde se vai unha porcentaxe importante da carne de poldro galego.

«Véndese moito a Italia, ao mellor un 90 %, e desde alí expórtase a Noruega, a Japón... E outra parte do que se produce en Galicia tamén se vai para a zona do Levante. Aquí quédase unha parte mínima», asegura a veterinaria, que indica que en Europa, os referentes de produción da carne de poldro son España e Polonia.

Coidado do territorio

Ademais de destacar a calidade e as propiedades desta carne, en Puraga apostan polo consumo de proximidade e tamén consideran que a cría en liberdade deste gando axuda na conservación dos montes e a manter coidado o territorio para previr incendios.

A hostalería focense divulgará o produto na Ponte de Santos

ACIA-Centro Comercial Aberto, en colaboración co Concello de Foz, Impulsa Foz, Xunta de Galicia e a asociación Puraga promoven as xornadas gastronómicas previstas en Foz e nas que participarán os seguintes bares, cafeterías e restaurantes: A Rambla, Pachán, A Viela, Anduriña, As Brasas, Augas Santas, Casa Damián, Dandy, Hotel Oca, O Lar, O Muelle Bares, Pizzería Xoiña, Portochico, Tangarte e Xoyma.

---

---

---