10 marcas únicas para regalar sen saír de Galicia

Non están todas as que son, pero sin duda esta selección de marcas galegas que se contan cos dedos de as dúas mans están feitas con esmero, mimo e esixencia, e por iso son únicas. Xoias, láminas, xoguetes, lámpadas, cosmética, axendas, bordados, pantalóns vaqueiros, bolsos... pasaron durante os últimos meses polas mans destes variados artesáns para ofrecer un catálogo improvisado que pode facer feliz este Nadal (ou en calquera outra época do ano) aos amantes das cousas bonitas e mimadas. Estas son as nosas propostas:

A boba e a loura

Esta marca de bixutería e xoiería feita a man en Galicia, con mimo e moito humor, ofrece as súas persoais pezas de latón, pedras e esmaltes, que se agrupan en coleccións tan salerosas como Baila que ritmo che sobra ou A Llorona. Recentemente, lanzaron tamén a súa primeira colección de ouro, Pitita, un material que traballan habitualmente para facer alianzas personalizadas, na que reciclan as pequenas pezas de ouro que achegan as parellas para facer aneis orixinais e cheos de historia familiar. Esta é a súa páxina web. 

Cru e nu

Pezas mínimas, limpas e útiles, na súa maioría feitas en madeira cálida e espida. Así é o traballo que sae deste taller con sede en Tomiño (Pontevedra) creado no 2015. Os seus obxectos xorden das necesidades da vida cotiá e van desde mobles e lámpadas a organizadores de sobremesa ou xoguetes para nenos. E se o que che ofrecen non encaixa coas túas necesidades, Cru e nu anímache a que lle contes a túa idea para que eles a fagan realidade. Aquí está a súa tenda.

A Bananeira

Visitar A Bananeira, o cuartel xeral da ilustradora Andrea Fernández na Illa de Arousa, é en si mesmo un agasallo. O seu proxecto inclúe talleres de distintas disciplinas (serigrafía, encadernación, cestería, caligrafía... ) que programa ao longo do ano, residencias estivais para xente inqueda e creativa e un estudo onde calquera creador pode materializar os seus proxectos, ademais, claro, das pezas feitas pola propia deseñadora en cerámica, tea e papel. Esta é a súa oferta. 

Muuhlloa

«Cosmética galega, ecolóxica e irmandiña», é como se autodefine Muuhlloa, unha marca impulsada por cinco mulleres que apostan polo rural galego e que naceu, segundo elas mesmas contan, da sinerxía entre Granxa Maruxa e Milhulloa. O que ofrecen é cosmética feita ao 100 % con produtos ecolóxicos e que ten entre os seus principais ingredientes algúns tan autóctonos como o leite de vaca, as algas ou o pemento de Padrón. Venden na súa páxina web e nunha ampla rede de tendas de toda a comunidade. 

Idoia Cuesta

A creadora téxtil Idoia Cuesta , Premio Nacional de Artesanía 2014 e colaboradora de Loewe no desenvolvemento e fabricación de bolsos, elabora no seu taller de Outeiro de Rei pezas de cestería contemporánea nas que combina as técnicas tradicionais con materiais orgánicos. As súas coleccións inclúen artigos de decoración feitos con las e tecidos de alta calidade, cestos, bolsos e complementos de moda. A súa tenda é esta . .

Xiro Atlantic Denim

No rural, preto de Santiago, ten o seu taller esta marca ecolóxica que confecciona os seus pantalóns vaqueiros con algodón orgánico certificado. Xiro non fai moda, senón «roupa con carácter», un carácter sin duda atlántico, como deixan claro no seu nome. De feito, abonda ver como bautizaron algúns dos seus pantalóns (Rodas, Melide, Pantín...) para sentir o cheiro do océano. Ademais de jeans 100 % galegos, tamén deseñaron unha camiseta feita cos mesmos criterios ecolóxicos e na que resumen a súa filosofía: «It's not about fashion, it's about you!» (Non se trata de moda, trátase de ti). As súas pezas están dispoñibles en tendas físicas de Galicia, España e tamén Alemaña e na súa páxina web. 

Variado 

A paixón pola fotografía e o bordado está detrás deste pequeno estudo que ofrece bastidores, bolsas e outros complementos feitos a mans e con temáticas que mesturan motivos da natureza con referencias moi populares do mundo do cine, a arte e a televisión. As referencias son tan variadas que é posible facerse cun bordado dos zapatos vermellos de Dorothy no mago de Oz, dos protagonistas da A Land ou da propia Rosalía (de Castro) cun tocado de toxos ou de margaridas. Este é o recuncho Variado. 

Anaquiños de papel

Dúas irmás chegadas ao deseño desde o dereito e a arquitectura asinan esta marca que crea os seus obxectos aplicando o origami-papiroflexia á decoración. Na súa tenda en Etsy, ofrecen orixinais lámpadas de papel, láminas e agasallos tan infalibles como unha varita máxica, pero o seu traballo por encargo e a través de catálogo inclúe tamén ramos de flores, papelería para eventos ou talleres. Todos os detalles están na súa web.

Nuria Díaz

Agasallos para todos os petos con ilustracións moi persoais e divertidas. A ilustradora Nuria Díaz plasma o seu universo en láminas, cuncas, bolsos e artigos de papelería e crea tamén o propio de cada cliente, con ilustracións personalizadas que se converten en pezas únicas. Un agasallo tan redondo que os pedidos para este nadal xa están pechados, aínda que a súa tenda ofrece moitas máis opcións. Os seus produtos tamén se venden en tendas físicas. 

Irmás Cartoné

Os promotores desta pequena editorial independente son dous tradutores e boa parte do seu traballo está centrado na tradución ao galego de textos que consideran clásicos e que presentan nunhas edicións moi coidadas, que trasladan tamén ás súas «outros» produtos: cadernos de estilo vintage con motivos naturais e os seus cada vez máis populares axendas, que están cheas de breves citas literarias e ilustracións. A proposta para o 2019 é avanzar polo ano guiándose por un plano urbanístico detallado, despois dun 2018 que se guiou polo seu «mapa de estrelas, planetas e demais corpos celestes». Os seus produtos poden comprarse na súa web e en librerías.