Unha serie e un documental exploran as luces e as sombras de Maradona
PRATA Ou CHUMBO
Amazon Prime prepara unha ficción biográfica sobre o astro do fútbol arxentino
29 ago 2019 . Actualizado á 09:11 h.Unha serie e un documental chegarán proximamente ás plataformas para repasar a turbulenta vida de Diego Armando Maradona, con todas as luces e as sombras do histórico Dez do fútbol arxentino. HBO acaba de confirmar que o 1 de outubro estreará Diego Maradona, un documental dirixido por Asif Kapadia (autor dos documentais sobre Ayrton Senna e Amy Winehouse) que xa pasou polos cines e que pretende ser a obra definitiva sobre a vida do xogador arxentino. «Cando vin o documental inacabado que se fixo sobre el en 1981, material que atopei nun arquivo en Nápoles, quedei alucinado. Foi algo incrible poder contar con esas imaxes que nos deron unha visión ampla e clara da súa vida entón. Sempre pensei que a vida de Maradona era unha tolemia. Sabía o que lle pasara porque a min gústame o fútbol. Non cheguei a este documental a cegas, como me ocorreu con Amy e Senna», asegurou a Colpisa Kapadia, que define ao deportista como «un home intelixente e carismático, obrigado a enfrontar os seus propios demos porque ninguén máis é Maradona».
O documental conta con máis de 500 horas de material inédito que foi recuperado de arquivos de cadeas de televisión aínda sen dixitalizar e tamén de propietarios privados. Céntrase no ascenso do mito durante a súa etapa no Nápoles, xusto despois do seu paso polo Barcelona. En explorar esa etapa na liga española céntrase o documental Fútbol Club Maradona, estreado a pasada primavera como produción orixinal de Movistar+. Este traballo subliña a pegada que o xogador deixou no club blaugrana a pesar de non conseguir cumprir os obxectivos que agardaban del por aquel entón.
Pola súa banda, Amazon Prime prepara unha ficción sobre a vida do futbolista que recreará diferentes momentos da súa existencia. «Maradona é unha serie biopic dunha hora que seguirá os triunfos e retos deste futbolista lendario, así como os momentos clave tanto da súa carreira profesional como da súa vida persoal», subliña Amazon Prime.
Tres actores encarnarán ao que foi un dos máis grandes e polémicos xenios do fútbol nas diferentes etapas da súa vida. O mozo Maradona será Nicolás Goldschmidt, actor na serie televisiva Supermax. O papel correspondente á súa mediana idade encarnarao Nazareno Casero e na súa etapa adulta será interpretado por Juan Palomino.
Outro dos papeis destacados desta serie estará interpretado por Laura Esquivel (Patito Feo) no papel de Claudia Villafañe, quen estivo casada con Maradona en 1989 e de quen se divorciou unha década despois.
«Hai certos xogadores cuxa notoriedade transcende xeracións e barreiras xeográficas. Maradona é un nome coñecido por todo o mundo e os seus logros profesionais seguen sendo obxecto de debate na historia do fútbol», asegurou Brad Beale, vicepresidente de adquisición de contidos para televisión de Amazon Prime Vídeo, nun comunicado da plataforma. «A serie mostrará un lado sen precedentes de Diego, non só como un campión senón como home», engadiu.