Trátase da serie Unbreakable Kimmy Schmidt que contará con a participación de Daniel Radcliffe
15 jun 2019 . Actualizado ás 20:02 h.Un novo «elixe a túa propia aventura» chega a Netflix. Despois do éxito cultivado con Bandersnatch , o capítulo interactivo de Black Mirror, a plataforma aposta por facer algo similar, pero nesta ocasión coa serie Unbreakable Kimmy Schmidt.
A estrea do capítulo está previsto para o 2020, pero descoñécese a data exacta. O que si se confirmou é a participación de Daniel Radcliffe nel. O actor encarnará a un personaxe chamado Frederick, tal e como deixou ver Netflix nun chío publicado na súa conta. Non se sabe aínda que relevancia terá no transcurso do capítulo.
Interactivo
Segundo un comunicado de Netflix, neste capítulo interactivo os espectadores poderán elixir os pasos que vai tomando Kimmy. «¡Tres estados! ¡Explosións! ¡Unha hamburguesa que baila!» son algunhas das opcións entre as que haberá que elixir para poder avanzar na historia, cuxo desenlace e obxectivo final será que Kimmy chegue a tempo á súa voda.
Polo medio entrará en xogo un malvado plan do reverendo Richard Wayne, interpretado por Jon Hamm (Mad Men), e uns robots que farán todo o posible por empezar unha guerra contra Kimmy.
Final de serie
A finais de xaneiro Netflix estreaba a última tempada de Unbreakable Kimmy Schmidt. Para sorpresa dos fans, chega este capítulo extra á historia da protagonista que, segundo a cocreadora e produtiva executiva da serie, Tina Fey, «será un gran xeito de culminar oficialmente a serie».