O menor tivo que ser trasladado ao hospital no helicóptero medicalizado de Urxencias Sanitarias
18 jun 2025 . Actualizado á 21:48 h.Un neno resultou ferido grave tras sufrir un atropelo en Val do Dubra. O 112 Galicia tivo constancia do accidente ás 15.30 horas e activou un operativo centrado en lograr evacuar ao hospital o máis urxentemente ao menor, polo que se lle trasladou no helicóptero medicalizado de Urxencias Sanitarias.
O coche que atropelou ao neno circulaba pola rúa de Entreponte, en Portomouro. A persoa que deu aviso a emerxencias xa advertiu que o menor estaba ferido de gravidade e o propio alcalde dubrés, Diego Luis Díaz, púxose en contacto co 112 para explicar que parecía presentar unha fractura e un golpe na cabeza que facía necesario levar a cabo un exame profundo das posibles consecuencias.
Ademais do 061, o centro de atención ás emerxencias mobilizou tamén á Policía Local de Val do Dubra e á Garda Civil de Tráfico, así como aos voluntarios da agrupación local de Protección Civil.