PSOE e Anova pechan un «cogoberno» en Val do Dubra con Diego Díaz como alcalde
VAL DO DUBRA
Antonio Negreira será o primeiro tenente de alcalde e o Concello disporá de Xunta de Goberno Local
15 jun 2023 . Actualizado ás 05:00 h.Diego Luis Díaz converterase este sábado en alcalde socialista de Val do Dubra despois de que o PSOE local e Anova pechasen un acordo de «cogoberno» para o próximo mandato. Así, Diego Díaz será rexedor durante os catro anos e Antonio Negreira, cabeza de lista de Anova , asumirá a primeira tenencia de alcaldía. Ambos exercen agora como edís na oposición e en varias ocasións promoveron iniciativas conxuntas, incluídas denuncias contra o alcalde popular, Manuel Varela, que foi o máis votado o 28M tras gobernar co apoio de Terra Galega e un edil independente.
Diego Díaz e Antonio Negreira anunciaron onte nunha comparecencia compartida o seu goberno de coalición. Díaz destacou «a inmensa xenerosidade de Anova» por facilitar a alcaldía socialista, xa que este partido, que gañou os comicios no 2019, quedou esta vez en terceiro lugar a só 66 votos de diferenza cos socialistas. Pola súa banda, Antonio Negreira sinalou que a opción dun goberno compartido «non é o mellor para Val do Dubra».
Ambos sinalaron a facilidade para pechar un acordo de goberno estable que, en liñas xerais, xa ten as áreas repartidas. O PSOE asumirá as competencias en materia de urbanismo, medio ambiente, administración xeral, economía, facenda, turismo, igualdade e servizos sociais. E Anova encargarase de obras e servizos, educación, cultura, emprego, medio rural, patrimonio e innovación.
A asignación concreta de concellarías e a parte económica de retribucións xa está concretada e anunciarase durante o pleno de organización, unha convocatoria que ambos desexan realizar «canto antes». Tamén confirmaron que unha das primeiras decisións será constituír a Xunta de Goberno.
Ademais da sintonía persoal dos dúas cabezas de lista e dos membros das súas respectivas candidaturas, Díaz e Negreira destacaron que facer un programa de goberno conxunto non resultou difícil porque comparten prioridades. Entre elas, encargar unha auditoría de contratación e contas, sobre todo do último ano. Tamén revisar o proxecto do polígono industrial, recuperar coa Deputación a remodelación da travesía de Bembibre, promover unha senda peonil e ciclista entre Portomouro e Bembibre, ademais do asfaltado de pistas. Traballar para que o municipio teña un novo plan urbanístico é outro proxecto común, do mesmo xeito que reforzar contactos con Santiago.
Díaz e Negreira ven este mandato como «oportunidade histórica» unha para a esquerda e para Val do Dubra, xa que por vez primeira teñen maioría absoluta, dado que a alcaldía do PSOE entre 1983 e 1987 foi por unha carambola con Pombo Grille como único edil, mentres que a segunda ocasión a tivo o propio Antonio Negreira entre 2015 e 2019, cando obtivo maioría simple pero sen ningunha forza de esquerda coa que pactar.