Jesús Reboredo, o candidato con máis apoios no 2023, acusou o rexedor saínte, Roberto Castro, de «abuso de poder»
12 ago 2025 . Actualizado á 17:55 h.O Partido Popular recuperou a alcaldía de Touro, municipio coruñés de 3.387 habitantes, mediante unha moción de censura asinada polos seus cinco concelleiros e un edil non adscrito, Darío Rey, que formaba parte da agrupación Movemento Veciñal de Touro, que nas últimas eleccións municipais daba a sorpresa ao conseguir catro concelleiros e lograr o apoio na sesión de investidura dos únicos concelleiros do BNG e do Partido Galego.
«Somos os mesmos de sempre pero agora con poder», afirmaba o popular Jesús Reboredo tras recibir o bastón de mando nun salón de plenos cheo de rexedores e cargos do PP, que acabaron facendo unha foto de familia na que non faltou o exregidor popular Ignacio Codesido, que non optou á reelección hai dous anos.
Numeroso público acudiu ao consistorio para seguir con tranquilidade e respecto a moción de censura, un proceso regrado que só se saíu do guion cando o edil que posibilitou o cambio de signo político en Touro abandonou o salón de plenos no momento no que o aínda alcalde, Roberto Castro, tomaba a palabra para cualificar de «politicamente indesexable» o apoio de Darío Rey á moción de censura. Roberto Castro defendeu a súa xestión en minoría e acusou a Reboredo de mentir, ademais de anunciar que o seu partido exercerá unha oposición responsable, algo que non viu no Partido Popular.
O representante do Partido Galego que formaba parte do goberno, non quixo facer uso da súa quenda de palabra mentres que o concelleiro do BNG, Xan Louzao, expresou o seu rexeitamento á moción porque supuña darlle a alcaldía ao PP, pero cuestionou abertamente a xestión de Movemento Veciñal de Touro e do propio Roberto Castro, cuxa forma de gobernar comparou coa de Julio César, establecendo tamén un paralelismo político sobre a traizón que motivou a súa caída.
O novo alcalde defendeu a moción de censura como consecuencia lóxica do debate de reprobación a Roberto Castro e tamén da última sentenza que anula o acordo plenario co que Castro logrou que o pleno aprobase a súa retribución salarial despois expulsarlle do debate e así gañar a votación. Para Reboredo, este feito foi unha proba máis do que considerou un «abuso de poder».