Touro contará cun plan de emerxencia para evitar cortes de auga durante o verán
TOURO
Goberno e oposición acordaron estudar medidas, aínda que discrepan nas causas da suspensión do servizo en xuño
13 jul 2025 . Actualizado á 05:05 h.O Concello de Touro contará cun plan de emerxencia para paliar incidencias na rede abastecemento de auga como as que, a finais do mes pasado, deixou sen servizo, en plena onda de calor, a cinco parroquias e ao centro urbano en Fonte Díaz. Aprobouno por unanimidade o pleno da corporación municipal, a iniciativa do único edil do BNG, Xan Louzao, que urxiu medidas ante o convencemento de que «o problema vai volver aparecer e, ademais, de maneira inmediata». E aínda que «por primeira vez neste concello faltou a auga», o problema no servizo de abastecemento «é estrutural», asegurou, e repítese «dende hai bastantes anos no verán», lembrou,
A redacción dun estudo encamiñado a mellorar a capacidade de captación da rede tamén forma parte do acordo que adoptaron goberno e oposición de Touro, nun pleno ordinario no que a xestión do servizo de abastecemento acaparou o debate. O derivado da moción do BNG aumentou co que suscitou a presentada polo PP para coñecer as causas da interrupción do servizo en xuño. Nese extremo, non hai acordo entre a oposición e o equipo en minoría do alcalde independente Roberto Castro.
O rexedor de Touro insiste en que carece de máis responsabilidade que a «fiscalización» que lle atribúe o contrato subscribido coa concesionaria. De acordo co mesmo, «a xestión integral correspóndelle á empresa», sostén Roberto Castro, en palabras do que «evidentemente, as deficiencias na xestión derivaron na interrupción do servizo». A lectura do PP —que, entre outras cuestións, denunciou publicamente que se utilizou unha cisterna de xurro para captar auga, que, ademais, transportou no seu propio tractor un empregado municipal— atribúelle toda a responsabilidade ao executivo de Castro. «O corte da auga evidencia a nefasta xestión do goberno municipal, que, en dous anos de mandato, non fixo nin unha soa proposta para mellorar o abastecemento, cando todos somos conscientes de problemas como son a falta de auga nos meses de seca durante os últimos anos, o aumento de usuarios e do consumo, e unha deficiencia na distribución que, segundo a concesionaria, ten un rendemento do 67 por cento, cunha, por tanto, excesiva perda de auga».