Un incendio destrúe unha casa en Tordoia e o Concello ten que buscar unha alternativa habitacional a unha parella cos seus dous fillos
TORDOIA
A familia non estaba na vivenda cando se declarou o lume, que destruíu por completo o piso superior e fixo colapsar ao tellado
14 dic 2023 . Actualizado ás 20:47 h.Un incendio destruíu unha casa en Tordoia e a familia que habitaba o inmoble, unha parella con dous fillos, quedou sen fogar, polo que os servizos sociais do Concello tiveron que buscarlles unha alternativa habitacional. O alcalde, Antonio Pereiro (PP), explica que en tan só cinco horas lograron recolocalos a todas nunha vivenda municipal.
O lume iniciouse pasadas as 12 horas, cando a familia non estaba na vivenda, o que facilitou a súa propagación pero tamén evitou danos persoais. As chamas destruíron por completo todo o piso superior da casa e fixeron colapsar o tellado. O baixo foi menos afectado, pero tamén quedou inutilizado pola auga que se tivo que utilizar para a súa extinción.
Da virulencia do incendio fala ben claro o feito de que a pesar do labor dos Bombeiros de Ordes , que foron os encargados da extinción, aínda quedan rescaldos que posiblemente seguirán botando fume durante uns días. Tamén interviñeron axentes da Policía Local e da Garda Civil.
Nas próximas horas e cando estea garantida a seguridade, os Bombeiros acompañarán á familia á vivenda para que poidan recuperar as pertenzas que non teña destruído o lume. O aviso ao 112 Galicia deuno unha das habitantes da casa, que non estaba nese momento no inmoble pero á que lle advertiron do que estaba a suceder.