Camilo Seira é o autor do impoñente cabalo de pedra montado por un xinete que onte se instalou na carballeira de Francos
03 novs 2021 . Actualizado ás 14:14 h.A carballeira de Francos conta desde onte cun novo habitante. Ao lugar de Teo onde tradicionalmente se celebra a Feira do San Martiño chegou o primeiro cabalo deste ano, un robusto e impoñente exemplar de catro toneladas esculpido en pedra. O seu autor, Camilo Seira, quixo render homenaxe con esta peza a unha cita moi especial para el. «A min tócame a fibra esta feira cabalar porque xa de pequeno asistía a ela co meu pai e os meus irmáns. Vivo a un par de quilómetros da carballeira e tivemos cabalos, polo que sempre a vivín desde dentro. Viñamos de noite e pasabamos o día. E, xa cando te vas facendo maior, ves cos amiguetes facendo esmorga. Sempre me sorprendía ver a esas persoas en comuñón co animal, dominando a aqueles percheróns e bretóns, uns cabalos xigantes que para os ollos dun neno coma min semellaban elefantes», relata o escultor e pintor de Rois que leva o nome da súa parroquia por bandeira. E foi precisamente esa imaxe a que quixo transmitir.
«No Castro Lupario, aquí pegado á carballeira de Francos, apareceron pezas castrexas con esa estética primitivista e con trazos pouco definidos», apunta, y en esas «liñas plásticas castrexas» inspirouse para dar vida a un cabalo montado por un xinete «de volumes moi grotescos». Empregou un bloque de granito de Lalín de 10 toneladas, ao que foi dando forma durante case un ano con detemento e paciencia, coas súas mans como ferramentas e o cincel, punteiro, pico e mazo como extensións delas. «Quedouse nunha peza de 4.000 quilos, que din que é o polbo que se come nun día no San Martiño», comenta con voz divertida.
Como curiosidade, engade, utilizou un pigmento natural pouco habitual para o acabado da figura: «Esta é unha pedra que recén traballada queda moi branca e cerca da miña aldea naceu un cabalo. Utilicei o sangue desa placenta como pigmento natural, o que lle da unha cor agranatada e vincúlase co discurso primitivo dunha forma coherente. A peza adquire un carácter de relicario, conectando o cabalo de pedra á parte orgánica do animal», explica o pupilo da escola compostelá de artes e oficios Mestre Mateo, licenciado en Belas Artes e discípulo de Francisco Asorey. Non é a primeira vez que Camilo Seira utiliza o sangue nunha das súas obras, repartidas por numerosos concellos galegos e ata en Marbella e Madrid. A da carballeira de Francos é a súa segunda escultura para o Concello de Teo, para o que xa fixo o seu Monumento á leiteira de Cacheiras.