Foi o creador en 1974 do Arquivo Histórico Diocesano, a cargo do que seguía na actualidade como director
18 jun 2025 . Actualizado á 21:42 h.Salvador Domato Búa, cóengo da Catedral de Santiago e director do Arquivo Histórico Diocesano compostelán, faleceu na mañá deste mércores. Nado no ano 1944 en Caldas de Reis, Domato Búa cursou estudos de Filosofía e Teoloxía no Seminario Maior de Santiago, e licenciouse en Teoloxía en Roma en 1968, un ano despois da súa ordenación sacerdotal na mesma cidade. Diplomado en Arquivística e en Biblioteconomía creou no ano 1974 o Arquivo Histórico Diocesano, institución diocesana a cargo da cal continuaba como director.
Nunha vida dedicada ao servizo de la Iglesia, foi secretario xeral do Arcebispado de Santiago entre 1989 e 1994, e secretario particular do arcebispo de Madrid, naquel momento Antonio María Rouco Varela, entre 1994 e 2005. Entre as súas tarefas estivo a coordinación das visitas do papa Xoán Paulo II a Santiago de Compostela en 1982 e 1989, así como a de Bieito XVI no 2010. Fora designado cóengo da Catedral compostelá no 2006, exercendo durante algúns anos como responsable da comisión de Cultura e Arte, sendo desde o 2017 párroco da Corticela.
Monseñor Prieto sinalou que Domato Búa na súa traxectoria como sacerdote procurou sempre «vivir desde a xenerosidade e o servizo» ante os requirimentos de la Iglesia diocesana e galega, con servizos que foron máis aló da Arquidiocese de Santiago. Destacou o arcebispo a súa grande experiencia eclesiástica e que soubo exercer sempre con responsabilidade e eficacia as misións encomendadas: «Abonde pensar que estivo detrás da organización de tres visitas papais a Santiago, e en toda a posta en marcha e organización do noso Arquivo Diocesano nun traballo eficaz, froito da súa preparación e da súa capacidade», recoñecendo o labor do falecido cóengo e destacando tamén os seus anos de dedicación á Catedral e á capela da Corticela.
O solemne funeral por Salvador Domato Búa ofíciase este xoves ás 17 horas na Catedral de Santiago, con posterior enterro no claustro catedralicio. O arcebispo de Santiago, Francisco José Prieto, e o Cabildo da Catedral rogan unha oración polo seu eterno descanso e a participación nas exequias e nas misas que se celebrarán polo seu eterno descanso o próximo día 25 e os días 3 e 18 de xullo.