A obra de Pastoriza, en Santiago, estenderase a abril e Raxoi non avanza data de remate tras varios atrasos

A obra de Pastoriza acumula un novo atraso e aínda que o concelleiro de Obras anunciou o último día de febreiro que era cuestión dunhas semanas e que se reabriría totalmente en marzo —aínda que quedasen detalles pendentes, como a reposición da iluminación—, non será así. A obra non só está inacabada, senón que á vista está que a súa conclusión non é cuestión duns días. Estenderase polo menos a abril.

Iniciada a mediados de setembro cun prazo de execución de 88 días laborables (uns catro meses en total), debería estar lista en xaneiro, aínda que o Concello xustificou o primeiro atraso pola alteración na súa programación que supuxo a reunión do Ecofin en setembro na cidade e a apertura do curso escolar, ademais das fortes choivas de outubro.

Despois chegarían os problemas coa subministración da pedra que incorpora o proxecto, que quedaron en evidencia cando os traballos non se renovaron inmediatamente tras Nadal. E non se retomarían ata o último tramo de xaneiro, con escasa actividade, pendente a contratista aínda da recepción dese material. Raxoi situaba entón ao redor dun mes o prazo de remate, sempre dependendo das inclemencias do tempo, as mesmas ás que se remite agora, ante a borrasca que varre a Semana Santa, para evitar avanzar novos prazos despois de que o responsable de Obras, o nacionalista Xesús Domínguez, dese por feito que estarían en marzo cando o PP esixiu explicacións pola marcha das obras no pleno do 29 de febreiro.

Domínguez anunciaba entón a rescisión do contrato, tras o rexeitamento á petición formulada ese mesmo mes pola adxudicataria para ampliar 25 días máis o prazo da obra, e proxectaba a apertura da rúa «para as persoas e os vehículos posiblemente nun par de semanas», dependendo das condicións meteorolóxicas «en todo caso».

Coas obras inacabadas á vista, a rúa segue cunha única dirección (en sentido de saída cara a San Caetano), o que obriga aos residentes e aos servizos do transporte público que veñen do norte a dar a volta por Xoán XXIII e a Estila para acceder ao barrio. E aínda que si é visible a instalación da pedra que xerou o atraso en xaneiro e que perfila a separación entre a zona peonil e a calzada, o tramo obxecto de reforma segue levantado na marxe dereita en dirección saída da cidade.

A rescisión do contrato aínda non se resolveu. Segundo a alcaldesa, Goretti Sanmartín, afirma que se está mirando desde o punto de vista técnico e xurídico a situación contractual. Así o apuntou onte no programa Voces de Compostela, de Radio Voz. «Estamos esperando os informes antes de tomar ningunha decisión ao respecto» e «supoño que irá por esa vía», pola rescisión, pero, «mentres non teñamos todos os informes técnicos e xurídicos diante, imos agardar», dixo a rexedora, remisa a entrar en máis detalles sobre o curso da obra ata dispor dos devanditos informes, aínda que asume que só a climatoloxía «non xustifica este imporante retraso», apuntou, tras lembrar as outras incidencias xa admitidas por Raxoi. Sanmartín pediu desculpas «polas molestias» e «para a semana que vén espero que o impulso sexa grande», concluíu.

---

---

---