Cornes Espazo Residencial, obra de Carbajo e Barrios desenvolvida por Arial, gaña o Premio de Arquitectura de Galicia

O xurado da cuarta edición dos Premios de Arquitectura  e Rehabilitación de Galicia 2023 seleccionou a  CornesEspazo Residencial, un conxunto de 125 vivendas e espazos verdes na zona do mesmo nome de Santiago , como mellor proxecto de arquitectura de Galicia dos anos 2020-2022. É obra de Carbajo e Barrios Arquitectos, desenvolvido pola inmobiliaria Arial, e obtivera xa o premio do Colexio de Arquitectos de Galicia 2023 e o premio Juana de Vega de Intervencións na Paisaxe. A colaboración de Arial e Carbajo-Barrios tivera xa anteriores recoñecementos: no 2017, o Colexio de Arquitectos de Galicia concedeu o primeiro premio de vivenda ao edificio Galeras-Entrerríos, en Santiago; e de novo fixéronse con ese recoñecemento no 2019, co edificio Trece Rosas, tamén na capital galega.

Arial, que iniciou a súa andaina en plena crise inmobiliaria no ano 2008, desenvolveu desde entón 500 vivendas, tanto en cooperativa como en promoción propia. Fixa agora o seu interese na Coruña, na nova urbanización de San Pedro de Visma, onde pechou acordos de compra sobre o 25 % do sector co obxectivo de desenvolver 900 vivendas, tanto libres como de prezo concertado: «Sempre buscamos actuacións que supoñan unha forte transformación e rexeneración urbana, co ánimo de ofrecer vivendas de alta calidade e arquitectura a prezos competitivos», explica o conselleiro delegado, Juan Álvarez. Sinala que as máis de 3.500 vivendas e 350.000 metros cadrados de urbanización nesa zona suporán un envorco no mercado de vivenda na cidade herculina, libre e protexida: «A día de hoxe, Visma é o único ámbito da Coruña capaz de transformar o mercado da vivenda, e ao mesmo tempo xerar a maior bolsa de espazos libres e equipamentos públicos».

Álvarez Rivera sinala que a inmobiliaria galega continuará coa súa senda de arquitectura singular e de calidade, «con especial énfase na eficiencia enerxética e a utilización de materiais duradeiros, sostibles e, a poder ser, de manufactura en Galicia», como os sistemas de fachada Cortizo Infinity, de aluminio 100 % reciclaxes, ou madeira galega termotrada de Finsa . O máximo responsable de Arial indica que pretenden iniciar a comercialización e obras en Visma no 2024, cunha concepción do ámbito que concentra a edificabilidade e dedica así o 85 % de superficies a espazos libres. Arial tamén está a construír proxectos residenciais en Santiago, en Vigo e en Sanxenxo . Na cidade olívica lanzarán o próximo ano un proxecto de rexeneración urbana de 63 vivendas, e en Sanxenxo desenvolven un conxunto de 75 vivendas, con «a madeira de piñeiro galego termotratado como pel da edificación» e unha vexetación que cobre os espazos libres e as cubertas das construcións, con especies autóctonas de moi baixo mantemento e alta resistencia a cambios de temperatura e auga.

---

---

---