Santiago e Ames terán máis restricións desde o sábado polo crecemento do covid
SANTIAGO CIDADE
Arzúa e Melide seguen tamén en nivel alto. Brión, Padrón e Toques súmanse a Teo e Oroso en nivel medio
28 jul 2021 . Actualizado ás 13:30 h.Santiago e Ames terán desde a medianoite do venres ao sábado nivel alto de restricións, no que se manteñen Arzúa e Melide. Ademais, Brión, Padrón e Toques súmanse a Teo e Oroso no nivel medio. Así o comunicou o conselleiro de Sanidade este mediodía, tras a reunión do comité asesor da Xunta sobre a pandemia celebrada onte pola tarde. Esta decisión débese ao crecemento do covid neses municipios. Tamén continúa o aumento de casos na área sanitaria compostelá.
A nova situación supón que en Santiago e Ames prohibiranse as reunións de persoas non convivientes entre as 1.00 e as 6.00 horas; as persoas maiores de 12 anos deberán presentar un certificado completo de vacinación, unha proba negativa (PCR ou de antígenos) nas últimas 72 horas ou demostrar que pasaron a infección para acceder a locais de hostalería; péchanse os establecementos de lecer nocturno, e a ocupación das terrazas será ata o 50 %.
En Brión, Padrón e Toques as reunións entre non convivientes prohíbense entre as 3.00 e as 6.00 horas; será posible ocupar o 50 % dos establecementos de hostalería no interior e o 75 % en terrazas, previa acreditación da vacina ou proba negativa nas últimas 72 horas.
En Santiago identificáronse 607 positivos os últimos 14 días e 367 na última semana; e en Ames , 174 e 105, respectivamente. Ambos os municipios teñen unha incidencia acumulada (IA) superior a 500 casos por 100.000 habitantes a 14 días e superior a 250 casos por 100.000 habitantes a 7 días. Esta IA é a mesma que manteñen Arzúa e Melide (con 81 e 34 casos novos en Melide, e 41 e 14 en Arzúa, nos últimos 14 e 7 días, respectivamente).
En Toques tamén se sitúan nesas cifras de IA; mentres Brión e Padrón áchanse entre 250 e 500 casos de IA por 100.000 habitantes a 14 días e entre 125 e 250 a 7 días.
Máis positivos
O Sergas comunica que os positivos na área sanitaria de Santiago crecen ata 2.378. Son 104 máis que os notificados onte, tras descubrirse 150 novas persoas infectadas e dar de alta 46 curadas. Descenden os ingresos hospitalarios, ata 19 persoas: 2 na uci e 16 en hospitalización convencional no CHUS, e un nunha unidade convencional no hospital de Ribeira. Na última xornada efectuáronse máis de 1.800 probas para detectar casos asintomáticos: 990 PCR, 644 de antígenos e 219 doutras.