O Concello tramitou 12 sancións por exceso de capacidade no primeiro día de reapertura da hostalería

O Concello iniciou onte ata unha ducia de expedientes a outros tantos locais de hostalería no primeiro día de reapertura do sector por excesos de capacidade, o que levou ao alcalde a facer un novo chamamento á prudencia e a responsabilidade xeral da poboación, e dese sector en concreto, en liña co que esta mesma mañá realizaba o conselleiro de Sanidade a nivel galego. 

O bo tempo e o arranque da desescalada sacou á rúa a moitos cidadáns, desexosos de gozar da cidade en compaña de amigos e parentes e boa parte dos problemas de capacidade denunciados déronse nas terrazas, onde son os propios establecementos, lembra o alcalde, os que teñen que manter o control.

«Seguramente lles resulte complicado, pero eles son os responsables do funcionamento das instalacións que están ao seu cargo», afirma Xosé Sánchez Bugallo, preocupado por que os datos a unha semana vista poidan apuntar a unha involución que leve ao comité de expertos a propor novas restricións. «Non me gustaría que en oito ou nove días haxa que dar pasos atrás, senón adiante, pero todo iso estará condicionado á evolución dos datos». 

Con 135 casos activos e unha incidencia acumulada de 101 a 14 días, o alcalde destaca a boa evolución na cidade e a alegría que supón ver de novo «as rúas cheas de xente», pero tampouco obvia que estes «aínda son datos moi severos» que obrigan a «chamar a atención» da poboación. 

Pero non é a actividade na hostalería a única que inquieta a Raxoi tras o inicio desta nova desescalada. As festas en pisos, con «datos residuais» ultimamente, convertéronse nun novo elemento de preocupación. Se a volta á actividade deixaba onte unha ducia de denuncias na hostalería, as festas en pisos sumaban outras oito.A súa reactivación preocupa seriamente no Concello, sobre todo coa volta ás clases presenciais na Universidade desde este luns. 

---

---

---