Inaugúrase o martes, ás 20.00, no salón artesonado do Colexio de Fonseca, onde pode visitarse ata o 13 de febreiro
10 ene 2016 . Actualizado ás 04:00 h.A exposición Compostela, un ano de Voz 2015, mostra 59 das fotografías máis impactantes dos últimos 12 meses. Inaugúrase ás 20 horas do martes, con acceso libre, no Colexio de Fonseca, onde permanecerá ata o 13 de febreiro. Organízaa La Voz de Galicia, co patrocinio da Universidade de Santiago, a Secretaría Xeral de Medios da Xunta de Galicia e o Concello. Este evento ten continuidade desde 1998 como unha das citas do ano na cidade.
As obras asínanas Xoán A. Soler, Álvaro Ballesteros, Sandra Alonso e Merce Ares, fotoperiodistas da Voza. Dedican especial atención á tractorada que ocupou Compostela este verán, da que se extrae a utilizada no cartel anunciador.
A primeira instantánea é de Manuel Fernández Castiñeiras no xuízo polo caso do Códice Calixtino, en xaneiro; a última, da apertura da Porta Santa con motivo do ano xubilar da misericordia, en decembro.
Ademais, reflíctense as eleccións municipais e o cambio no goberno local, co alcalde Martiño Noriega e Compostela Aberta; actualidade do Parlamento; os xuízos de Asunta ou da Fundación Cela; concertos e outros actos culturais; as festas da Ascensión e do Apóstolo, ou a do San Martiño en Francos, e outras da comarca; o izado da bandeira multicolor no palacio de Raxoi; protestas de emigrantes retornados, afectados pola hepatite C, pais e nais de Rois, ou de mariñeiros do cerco; en deportes, o Obradoiro, Verónica Boquete, ou o mundial do trial en Teo; incendios forestais; Mariano Rajoy en Ordes; a capela ardente de Neiras Vilas en Bonaval, ou a actualidade meteorolóxica, entre outras.
Son fotos do xornal e de álbums da edición dixital, e acompáñase como foron reproducidas orixinariamente.