O ladrón do Códice: 200 anos de cárcere, pero non cumprirá máis de quince

«A Manolo os anos de cárcere danlle igual, pero o que máis dano lle fai é quedar sen o diñeiro». Esta frase foi a primeira reacción dun destacado membro do equipo que investigou o roubo do Códice Calixtino tras coñecer a pena de dez anos de prisión á que foi condenado o exelectricista da catedral de Santiago por levar o famoso libro e por sisar ao cabildo compostelán 2,4 millóns de euros.

Se iso é así, Manuel Fernández Castiñeiras ten moitos motivos polos que preocuparse, porque ten que reunir moito diñeiro para satisfacer as multas e indemnizacións ás que foi condenado. Dun lado, quedou sen os 1,7 millóns de euros que tiña nas súas casas, que xa foron devoltos á Igrexa. Pero como se considerou probado que roubou 2,4 millóns á catedral de Santiago, aínda ten que entregar outros 700.000 euros para saldar as súas débedas co cabildo santiagués. Unha cifra á que debe engadir os 268.425 euros que ten que pagar a Facenda polo delito branqueo de capitais polo que foi condenado ao comprar con fondos ilícitos o piso no que vivía o seu fillo no Milladoiro (Ames) e un apartamento na praia da Lanzada (Sanxenxo). Dúas propiedades que, ademais, seranlle embargadas se o Tribunal Supremo non atende o seu recurso.

A estes 968.425 euros que Manuel Fernández Castiñeiras ten que pagar súmanse agora os 410.400 euros de multa que lle foron impostos no segundo dos xuízos aos que tivo que facer fronte, o do roubo do correo aos seus veciños. Case 1,4 millóns de euros aos que habería que engadir os outros 268.425 euros aos que foi condenada a pagar a muller do ladrón do Códice, que tamén foi considerada culpable por branqueo de capitais.

En caso de non abonar o diñeiro, a familia de Fernández Castiñeiras exponse a perder non só o diñeiro que teñan nas súas contas correntes, senón os dous pisos que non van embargarse. Trátase da vivenda do Milladoiro na que vivía o matrimonio, así como a casa que herdou a muller da súa familia en Negreira.

Un ano por delito

A pesar da gravidade da pena no que a multas e indemnizacións refírese, a condena total de cárcere á que ten que facer fronte Manuel Fernández Castiñeiras non é pequena. Sobre o exelectricista da catedral compostelá pesan cinco anos de cárcere polo roubo do diñeiro na basílica, tres polo do Códice Calixtino e outros dous por branqueo de capitais. En total, dez anos de prisión. A esta pena hai que sumarlle a do xuízo cuxa sentenza se coñeceu esta semana e que supón unha condena de 190 anos de cárcere por outros 190 delitos contra a intimidade dos que foi considerado culpable. Un ano por cada un.

Agora ben, como se trata dun delito continuado, o Código Penal, no seu artigo 76, establece para estes casos que só se cumpra o triplo da máxima pena que lle foi imposta. É dicir, que como Castiñeiras foi condenado por 190 delitos dun ano de prisión cada un só tería que estar tres anos en prisión por esta causa.

Dez máis tres suman un total de trece anos de cárcere, pero como nas matemáticas da Xustiza uno máis un raramente son dúas esa condena podería chegar ata os quince anos. Por que? Fernández Castiñeiras recorreu ante o Tribunal Supremo a condena polo roubo do Códice e previsiblemente tamén o fará coa recente por apropiarse do correo dos seus veciños. Así, como a do Calixtino será firme antes, cando o sexa a das cartas ambas se acumularían e a pena máxima que se consideraría sería de cinco anos -do roubo do diñeiro-, polo que aos dez pola subtracción do libro habería que sumar estes cinco. En total, quince. A condición de que ambos os recursos sexan rexeitados polo Tribunal Supremo.

Acordo rexeitado

Deste xeito, o ladrón do Códice terá que facer fronte a unha condena total de entre trece e quince anos de prisión. Cantos pasará realmente entre reixas? Iso é imposible de calcular porque entran en xogo numerosos factores. A Fernández Castiñeiras prexudícalle a súa segunda condena, a dos 190 anos que se converten en tres ou cinco, para a obtención de permisos penais. Pero non é menos certo que pola súa idade, 65 anos, terá máis posibilidades de ver reducida a súa condena.

O que é evidente é que o ladrón do Códice debe de estar arrepentido de ter rexeitado o acordo que durante a instrución lle ofreceu a Fiscalía. Se admitise a súa culpabilidade non lle terían xulgado polo roubo das cartas aos seus veciños e a Catedral haberíase conformado con que lle devolvese os 1,7 millóns de euros que tiña no seu poder. Embargáronlle os pisos comprados con diñeiro ilícito no Milladoiro e na praia da Lanzada, pero non terían tocado os outros e tampouco lle terían imposto multas nin terían acusado á súa muller nin ao seu fillo. A pena de cárcere non tería sido maior de sete anos e tería podido alegar a súa enfermidade -ictus- para poder antes de prisión. Sorprendentemente, non aceptou e agora terá que afrontar as consecuencias.

O Código Penal establece que en delitos continuados cúmprese o triplo da máxima pena

Castiñeiras ten que pagar case 1,4 millóns á Igrexa, a Facenda e aos seus veciños

a condena do electricista

---

---

---