Uns seiscentos deportistas participaron na décima Carreira Dolmen de Dombate
21 sep 2025 . Actualizado á 05:00 h.Unhas seiscentas persoas gozaron en Cabana da décima edición da Carreira Dolmen de Dombate, integrada dentro do circuíto anual da Deputación dá a Coruña. Un evento que busca reforzar a idea de que revalorizar o patrimonio, tamén, a través do deporte, e que supón unha experiencia única. Entre as 17.00 e as 20.00 horas a contorna da catedral do megalitismo estivo moi animado. Ata alí chegaron afeccionados e corredores grazas ao tren turístico, un atractivo único desta proba.
Houbo varios percorridos para todas as categorías, desde pitufos a sénior e coas grandes citas no 3K e o 10K. No primeiro deles brillou como ninguén o carballés Adrián Fuentefría, do Fogar, que a pesar de ser sub-16, impúxose na clasificación xeral ao completar os tres quilómetros en 9 minutos e 53 segundos. Tras el chegou David Martínez, de Santa Comba (10.09). No apartado feminino, a máis rápida foi a tamén novísima Valeria Vigueret, sub-14 de Cabana (13.40).
A longa distancia pechou a xornada. Unha experiencia multisensorial para os case 300 corredores que tomaron a saída e atravesaron multitude de cultivos, cruceiros, explotacións gandeiras e, por suposto afeccionados que daban ese necesario empuxón anímico ao paso por Dombate, Fontefría, Vilaseco ou Borneiro, entre outros lugares. O santiagués Amador Pena (33.57) puido co camariñán Fran Pais (34.06). A muller máis rápida foi a coruñesa Noelia Souto (43.10).