Segundo accidente mortal en 24 horas na mesma estrada de Santa Comba: morre o condutor dun coche ao chocar contra un tráiler
SANTA COMBA
O domingo morreu un motorista e ambos os sinistros están só separados por tres quilómetros
23 jun 2025 . Actualizado á 16:06 h.As últimas 24 horas foron negras en Santa Comba no que a accidentes de tráfico refírese. Na mañá do domingo faleceu un motorista ao chocar contra un turismo e na do luns facíao o home que ía ao volante dun turismo que impactou contra un tráiler. Non só no mesmo concello, senón que ambos os sinistros tiveron lugar na mesma estrada, a AC-400, e a escasos tres quilómetros o un do outro. O primeiro no punto quilométrico 52 e o segundo no 49.
O novo choque produciuse sobre as 11.20 horas, á altura da parroquia de Vilamaior, preto do lugar de Traba, cando o turismo e o tráiler chocaron. O condutor do coche faleceu e a muller que ía no asento do acompañante sufriu lesións de carácter leve, mentres que o camioneiro que ía no tráiler resultou ileso.
A chamada dun particular puxo en alerta ao 112 Galicia, que inmediatamente enviou ao lugar do sinistro a sanitarios do 061, así como aos bombeiros do parque provincial de Santa Comba, a Garda Civil de Tráfico e voluntarios da agrupación local de Protección Civil.
Unha vez no lugar do accidente, os medios desprazados confirmaron a morte do condutor, cuxo corpo tivo ademais que ser excarcerado polos bombeiros.