O Concello trasladou a necesidade de acometer melloras en varios puntos da N-550
24 feb 2024 . Actualizado ás 05:05 h.O delegado do Goberno en Galicia, Pedro Blanco , reuniuse esta semana co alcalde de Padrón , Anxo Arca (PSOE), para analizar os investimentos da Administración central no municipio, cun importe que supera os sete millóns de euros, aínda que a maior parte destes fondos corresponden á ampliación e modernización da planta de abastecemento para Padrón e os concellos da ría de Arousa.
Esta infraestrutura estaa executando Augas de Galicia, organismo adscrito á Xunta, que xestiona neste caso 7,4 millóns de euros procedentes do Plan de Recuperación, Transformación e Resiliencia aprobado pola Unión Europea para paliar as consecuencias económicas da pandemia, e distribuídos polo Goberno central.
Esta ETAP ten un ámbito supramunicipal e interprovincial, xa que a planta de tratamento de auga potable abastecerá aos concellos da marxe dereita da ría de Arousa (Boiro, Catoira, Dodro, A Pobra, Pontecesures, Rianxo, Ribeira, Valga , Padrón e Vilagarcía de Arousa).
Con esta actuación, informa a Delegación do Goberno, «a estación de tratamento verá aumentada a súa capacidade dos actuais 450 litros por segundo que fornece na actualidade ata os 630 litros, o que porá fin ás limitacións de subminstración e permitirá ofrecer maiores garantías de abastecemento a unha poboación de máis de 90.000 habitantes». Unha das melloras que incorporará a remodelada planta é un sistema de recuperación da auga procedente do lavado de filtros, que agora se verten no río Ulla, polo que, tras a ampliación, o seu funcionamento será máis eficiente e sostible.
No transcurso da reunión, Pedro Blanco e Anxo Arca analizaron o impacto positivo da mellora da eficiencia enerxética da iluminación pública co uso de fondos para a renovación de luminarias tras un investimento de 240.000 euros e tamén a extensión da banda larga, que permitiu dotar de servizo de Internet a 794 fogares e empresas.
Aínda que non hai ningunha valoración oficial respecto diso, nin se anunciou compromiso algún, o Concello de Padrón abordou coa Delegación do Goberno as necesidades en varios puntos da N-550, estrada que vertebra o centro urbano.Tamén discorre polo núcleo de Extramundi , con terreos nos que teñen competencias o Ministerio de Transición Ecolóxica e a entidade ferroviaria ADIF e que se atopan nun estado de grave abandono, polo que a súa veciñanza reclama un proxecto de humanización e máis seguridade viaria no tramo.