O TSXG confirma a condena de 22 anos e medio de cárcere para o home que estrangulou á súa nai e queimou o seu piso en Oroso
OROSO
O xurado condenouno por asasinato e viu probado que atacou á muller aproveitando que estaba baixo os efectos dun sedante
01 mares 2024 . Actualizado ás 21:56 h.A Sala do Civil e Penal do Tribunal Superior de Xustiza de Galicia (TSXG) confirmou a condena de 22 anos e medio de cárcere que a sección primeira da Audiencia Provincial da Coruña impuxo a Javier G. S. de acordo ao veredicto de culpabilidade que emitiu o xurado popular, que o considerou culpable do asasinato da súa nai e de prender despois lume ao piso no que ambos vivían en Sigüeiro , o principal núcleo de poboación do concello de Oroso .
A sentenza castigoulle por un delito de asasinato, ao existir aleivosía, e doutro de incendio con risco para a vida ou integridade física das persoas, xa que só a rapidez coa que actuaron os bombeiros ese día de xuño do 2021 evitou que o lume se propagase polo resto do edificio.
Na resolución agora confirmada polo TSXG considérase probado que o condenado aproveitou que a súa nai estaba na cama para asfixiala utilizando unha peza de roupa, probablemente unha camiseta, que enrolou no seu pescozo e apertou, durante uns minutos, ata causarlle a morte. Tras acabar coa vida da muller, prendeu lume ao domicilio.
O xurado popular viu probado que o acusado «de forma deliberada e para eliminar a posibilidade de defensa da súa nai, atacouna por sorpresa, na cama, aproveitando que se atopaba baixo os efectos sedantes da inxesta de lorazepam », así como que a chamada de alerta que o condenado fixo ao servizo de urxencias do 112 Galicia avisando do incendio «contribuíu de xeito relevante a que os danos non fosen maiores», o que permitiu aplicarlle a atenuante de reparación do dano.
No recurso que a defensa de Javier G. S. presentou ante o alto tribunal galego alegou que se vulnerou a súa presunción de inocencia porque foi declarado culpable sen unha «proba suficiente» e limitaba a «indiciarias» as que recolleron os feitos probados da resolución xudicial que, na súa opinión, «non están reforzadas de xeito suficiente como para condenalo».
As probas cualificadas como indicios polo avogado do asasino de Oroso eran, cando menos, numerosas e rechamantes. En primeiro lugar, ao longo da tarde do 3 de xuño do 2021 e na madrugada do día 4, antes de que se producise o asasinato, Javier G. S. fixo procuras en Internet que coincidían co crime. Por exemplo, buscou desde a súa móbil cuestións como «sobredoses con lorazepam», «lorazepam e alcol» ou «os pacientes comatosos respiran» cando foi precisamente ese fármaco tranquilizante o que a autopsia determinou que inxerira a señora.
Houbo máis. Entre esas procuras tamén estivo «morte por rotura de pescozo» cando a súa nai foi estrangulada dese xeito. Tamén explosión e incendio de vivendas tras un crime», «perder coñecemento por inhalación de fume», xusto o que sucedeu aquel día.
O xurado tamén considerou unha proba de cargo o feito de que o día do crime Javier G. S. enviase varios wasaps á avogada que lles asistiu no procedemento de desafiuzamento ao que se enfrontaban e polo que ese mesmo día ían botarlles do piso. Neles confesaba dicindo «por certo, á miña nai mateina eu» e tamén lle advertía: «recoméndoche que non veñas, hoxe vai ser desagradable».
O acusado foi rescatado polos bombeiros cando o seu piso estaba completamente en chamas. Inxerira alcol nunha cantidade próxima ao coma etílico, con 2,43 gramos por litro de sangue.Tamén presentaba síntomas por inhalación de fume, pero puido reporse no hospital.