O lume afectou a unha zona situada baixo os soportais do inmoble
08 may 2025 . Actualizado á 20:53 h.Un lume que se declarou ao fío da unha e media da madrugada en Negreira obrigou a intervir ao parque provincial de Santa Comba.
O persoal de emerxencias presentouse ás 1.47 horas no inmoble afectado, situado na rúa Víctor García Ferreiro do concello nicrariense. Unha vez analizada a situación, comprobaron que o lume afectaba o cableado situado baixo os soportais do edificio, que está en obras e por iso hai instalada unha escaleira e elevadores.
A intervención consistiu na aplicación de auga desde unha distancia segura mediante chorros intermitentes, coa finalidade de comprobar que non houbese tensión eléctrica. Durante a última refrixeración produciuse unha descarga, o que confirmaba que as sospeitas dos bombeiros eran certas e que o incidente se producira porque un dos cables estaba danado. Por iso, solicitouse a intervención da compaña subministradora.
A intervención deuse por finalizada ás 2.15 horas. Ademais dos bombeiros de Santa Comba, o 112 Galicia mobilizou tamén á Garda Civil e ao Grupo de Emerxencias Supramunicipal (GES) de Brión.