O trazado mide 1,4 quilómetros e terá un custo estimado de 748.000 euros
29 ago 2025 . Actualizado á 05:05 h.A Consellería de Vivenda e Planificación de Infraestruturas incluíu o tramo da AC-960 entre Sergude e Rodiño (Boqueixón) no Plan de Sendas de Galicia cunha previsión de gasto de 748.000 euros. O proxecto foi presentado onte in situ pola propia conselleira, María Martínez Allegue, que puido comprobar, acompañada pola delegada territorial da Xunta, Belén do Campo, e do alcalde de Boqueixón, Ovidio Rodeiro, a intensidade de tráfico que soporta esta estrada, moi utilizada pola veciñanza do municipio e do de Vila de Cruzamentos, ata enlazar coa N-525 á altura da Susana (Santiago) tras superar o polígono industrial de Sergude.
O tramo mide 1,4 quilómetros e a súa construción permitirá conectar coa senda peonil xa construída, tamén pola Xunta, desde A Susana e o polígono ata Eirexe, sumando así un percorrido ininterrompido duns cinco quilómetros. A senda unirase, segundo destacou na presentación Ovidio Rodeiro, ao tramo peonil promovido polo Concello que enlaza coa estrada cara ao aeroporto, na parroquia de Vigo. Cando todas as obras estean rematadas haberá un trazado de sete quilómetros sen apenas pendente, o que tamén facilitará o seu uso ciclista por un itinerario seguro pese ao elevado volume de tráfico que soporta a diario, incluídos camións e grandes tractores. Este tramo peonil comunicará varias zonas de elevado tránsito pola concentración de servizos.
Melloras coa parcelaria
A nova senda terá un ancho de 1,8 metros, ampliándose nos puntos nos que sexa posible. Discorrerá por terreos que anos atrás cederon os veciños para habilitar unha improvisada senda de grava miúda, xa que a estrada carece de cunetas. A previsión autonómica é que o proxecto se redacte durante este outono, incluíndo canalizacións, para que poida iniciar a fase de licitación das obras a principios do 2026. Á presentación desta senda acudiron veciños da zona, que recoñeceron a necesidade de que se executase este proxecto.
Ademais desta senda peonil e ciclista, Ovidio Rodeiro expuxo á conselleira e á delegada territorial a posibilidade de que o proxecto de concentración parcelaria que se está executando nesta parroquia de Boqueixón poida ter en conta que os terreos que hai que dedicar a viais permitan habilitar un camiño no carril contrario a esta senda.
Esta solución melloraría así a comunicación peonil e tamén reforzaría a seguridade viaria, xa que os vehículos que deben incorporase á estrada teñen escasa visibilidade, tal e como sinalaron varios veciños durante a visita institucional.