Arzúa reúne a unha trintena de formacións na súa Festa da Gaita Galega, con homenaxe a Os Melidaos

Vinte e oito agrupacións músicais daranse cita este sábado en Arzúa para celebrar a Festa da Gaita Galega, que na que será a súa duodécima edición homenaxerá a Os Melidaos, unha formación de «gaiteiros que cantan», como eles mesmos se definen, que chega ao seu cuarto de século de traxectoria situado como un dos primeiros grupos da música tradicinal galega. Nun multitudinario xantar popular, compartirán mesa e mantel con músicos afecionados de grupos de Arzúa, de concellos da zona, como Melide, Boimorto, Santiso ou O Pino, doutros próximos, como Santiago, Oroso ou Boqueixón, pero tamén de municipios de máis lonxe, como Ribeira, Carral, Rodeiro, Taboada, A Coruña, Abegondo e Culleredo, entre outros. Logo do encontro gastronómico, as agrupacións participantes na Festa da Gaita Galega, que esgotaron en horas as prazas dispoñibles, recorrerán unha vintena de locais de hostalaría de Arzúa, nunha ruta de cantos de taberna que animará o ambiente ata ben entrada a noite.

Pero a cita na localidade arzuá dará comezo xa de mañá, cunha alborada a cargo de Os Faíscas de Solobeira. Ás 12.30 horas, e logo da recepción aos grupos participantes, está prevista a homenaxe a Os Melidaos, que volverán a Arzúa logo de actuar como un dos cabezas de cartel na última Festa do Queixo. É un tributo que reciben cunha «satisfacción grandísima», afirma nun vídeo dinfundio en redes o arzuán Antonio Raposo, voz principal da formación. No seu propio nome, e en representación dos seus compeñeiros, Raposo di que sentirse «orgullosos é pouco», ao ser, a da Festa da Gaita Galega, unha homenaxe que, no seu día, recibieron referentes da música galega como a familia Seivane, Xan Bello Mallou, Antón Corral, Treixadura, ou, a título póstumo, os melidenses Irmáns Garceiras.«É un recoñecemento grandísimo que axuda moito no traballo do día a día», engade o músico. 

---

---

---