O mozo deportista do Rítmica Compostela márcase como obxectivo lograr o campionato de España
23 abr 2024 . Actualizado á 20:18 h.Iván Gutiérrez Mosquera (Ames, 2010), do Club Ximnasia Rítmica Compostela, logrou no Campionato de España a medalla de bronce en categoría cadete. Cursa segundo curso da ESO e non ten moi claro cara a onde orientará o seu futuro profesional, máis aló de que é máis de ciencias que de letras. Pero non dúbida no seu obxectivo de seguir mellorando rexistros no deporte que máis goza e no que agarda seguir subindo banzos.
—Cando empezou a practicar ximnasia rítmica?
—Antes fixen ximnasia acrobática, no mesmo club no que sigo. Comecei aos catro anos. Unha adestradora animoume a que probase tamén na rítmica. E en quinto de Primaria tiven que elixir, porque, aínda que me gustan as dúas, non me daba o tempo para todo.
—Como empezou nesta disciplina?
—A miña nai animoume a que probase, e a verdade é que me gustou desde o primeiro día.
—Cantas horas adestra cada semana?
—Dezanove.
—Hai futbolistas que adestran menos. E tamén están os estudos. Como se organiza?
—Aplicoume bastante.
—É un xeito de dicir que saca boas notas?
—Si, saco boas notas. Despois de comer, e antes de adestrar, estudo. E aproveito moito as fins de semana.
—Contaba con subirse ao podio no Campionato de España?
—Agardábame un bo posto, porque o practiquei moito, pero non tanto como un bronce.
—E quedou a medio punto da prata e menos dun punto do ouro. Que faltoulle?
—Creo que a limpeza, estirar as puntas e todo iso. É o que trato de mellorar pensando xa no próximo campionato.
—Que é o que máis lle gusta da ximnasia rítmica?
—Os amigos que fas e os adestradores. Axúdanme moito.
—E o que menos?
—Non sabería dicir. O que máis me custa é o que comentaba da limpeza.
—Ata onde agarda chegar na ximnasia rítmica?
—Creo que vou seguir aínda bastante tempo, porque me gusta moito. O meu obxectivo é ser campión de España.
—Ten algún referente?
—Gústame moito Eneko Lambea (varias veces campión de España en categorías de base e tamén absoluto).
—Creo lembrar que estivo nun campus organizado polo seu club.
—Foi moi simpático. Aprendín moito.